Ibandla elisungulwe ngomnyaka ka2013 yizizalwane zeZimbabwe ezikwamanye amazwe, ezigoqela owayengumahluli womthethwandaba waphezulu owe High Court, uJustice Benjamin Paradza, ele United for Democracy – ZUNDE, liphawulwe okusemthethweni eZimbabwe ngoLwesibili ekuseni, eHarare.
Inkokheli yaleli bandla ithi kalisoze liphatheke kukhetho lwama By-elections olukhangelelwe ukuqhutshwa mhla zilitshumi ngoMabasa, ngoba ivumelana lamanye amabandla aphikisayo, akhankasela ukulungisiswa kwemithetho ekhuluma ngezokhetho.
Lokhu kuvezwe emhlanganweni lentathelizindaba owenzelwe eweteleni ye Jameson ngoLwesibili, lapho kusethulwa lelibandla okusemthethweni elisungulwe yizizalwane zakuleli ezikwamanye amazwe, ngoMpandula 2013.
Umkhokheli we ZUNDE, umnumzana Farai Mbira, uthi umcabango wokubumba lelibandla, uze ngemva kokuba abahlala kwamanye amazwe kilo bekubone kufanele ngoba ababusayo khathesi eZimbabwe sebehlulekile ukuthuthukisa leli lizwe.
Ubengekho umsekeli womkhokheli walelibandla, uJustice Benjamin Paradza, owake waba ngumahluli edale le High Court, osebikwa esebenzela kwele New Zealand.
UJustice Paradza ubaleke kuleli ngemva kokwetheswa umlandu wokungathembeki ekuqhubeni umsebenzi wakhe nguhulumende.
Umnumzana Onisimo Hweta, okhokhela ukuqoqwa kwenhlelo zaleli bandla uthi yena wafuqwa ukuba lilunga le ZUNDE, ngemva kokunanzelela ukuba liqonqosela umbuso oqotho elizweni.
Uthi uHweta, inkokheli ingaba ngezinzileyo ilizwe lilakho ukubuyela esimeni esihle ngoba wonke umuntu uzabe esesaba ukwephula imithetho mahlayana njengalokho okwenzakala okwamanje.
Amalunga alelibandla atholakala emazweni ehlukeneyo abalisa ele Australia, New Zeland, United Kingdom, America, Germany, South Africa lamanye.
Inkokheli ye ZUNDE ithembise ukulungisisa inotho yelizwe ngokuqala ilwisane lokungathembeki ngoba kuyilo olukhokhela kuzo zonke inhlupho esezidale ukonakala kwezinto zonke elizweni.
Ithi lanxa ilizwe lilemithetho emihle, engaphathisa ukulilondoloza, kayilandelwa ngendlela ngoba abasebukhosini bezenzela santando.
Kungakho bathi yiyo abazayisebenzisa, izephulamthetho zijeziswe ngokufaneleyo, ngaleyo ndlela lilungisiswe ilizwe.