Kulabaphikisayo labalwela ilungelo loluntu abafika phose ikhulu lamatshumi ayisikhombisa abavalelwe eRemand Prison bemelele ukuthoniswa amacala okwephula iziqondiso zomthetho owesatshwayo eZimbabwe oweCriminal Law (Codification) and Reform Act.
Abantu laba abagoqela amalunga eCitizens Coalition for Change betheswa amacala ukuqoqa imihlangano okungekho emthethweni, ukuzama ukutshotshozela udlakela lokutshengisela besola ukubotshwa kwabaphikisayo.
Isikhulumeli sebandla leZanu PF, uMnu. Chris Mutsvangwa, usanda kutshele amaphephandaba ukuba sokumele ababotshiweyo bekhululwe ngoba uqhutshwe kahle umhlangano omkhulu eHarare oweSADC Summit.
Lokhu sokudale inkulumo elizweni kulabanye abathi amapholisa, lemithethwandaba sokubanjwe xhaka libandla leZanu PF.
Ukuze sihlaziye udaba lolu sixoxe loMnu. Effie Dlela Ncube okunhlanganiso yeNational Consumer Rights Association loMnu. Joseph Tshuma omele iPelandaba Tshabalala edala lephalamende ekubandla leZanu PF. UNcube uthi akusalandelwa imithetho eZimbabwe njengoba uhulumende kaMongameli Emmerson Mnangagwa ebopha mahlayana abaphikisayo labalwela ilungelo loluntu.
Kodwa uTshuma uthi ibandla leZanu PF kalingeneli kokwenzakala emithethwandaba njalo lokubotshwa kwabacatshangelwa ukuba bephula imithetho.
Forum