Ibandla ebelisaziwa ngokuthi yiMDC Renewal Team, eliqale umhlangano walo weCongress ngoLwesine eHarare, seliguqile ibizo lalo laba yiPeople’s Democratic Party (PDP).
NgoLwesihlanu khona lelibandla lizakwazisa amabizo abakhokheli balo abatsha.
UMnu Tendai Biti nguye okhangelelwe ukukhokhela leli bandla njalo umsekeli wakhe kuzaba nguMnu Samuel Sipepa Nkomo.
I-PDP yethule unhlelo lwayo ethi luqondane lokuvuselwa komnotho olweHolistic Program for Economic Change (HOPE) lolukhangelane lezombusazwe kanye lokhetho olweAgenda for the Restoration and Rehabilitation of the Electoral Sustainability (ARREST).
Umhlangano lo ungenwe ngabakhokheli bamanye amabandla aphikisayo agoqela eleZapu, iMDC ekhokhelwa nguMnu Welshman Ncube, lePeople First ebimelwa nguMnu Jabulani Sibanda.
UMnu Sipepa Nkomo utshele lumsakazo ukuthi umhlangano lo ungenwe ngabantu abedlula inkulungwane ezinhlanu.
