Ibandla leCitizens Coalition for Change (CCC) lamukele ngenjabulo ngoLwesibili ukwesulwa kwesigwebo esafakelwa uMnu. Job Sikhala ngumthethwandaba oweMagistrates’ Court owamthola elecala lokuphazamisa abomthetho.
Ibandla leli lithi lenze kahle idale leHigh Court elithi uSikhala kalacala lokuphazamisa abomthetho.
USikhala, osehlale entilongweni okwedlula umnyaka emelele ukuthoniswa icala lokutshotshozela udlakela, kwakuthiwa wathi uNkosikazi Moreblessing Ali owebandla leCCC wabulawa ngabakubandla leZanu PF.
UNkosikazi Ali wathunjwa waganyulwa izitho zomzimba ezaphoselwa emgodini wamanzi enyatsime. Isidumbu sakhe lokhu sise Chitungwiza mortuary.
USikhala ligqwetha lika Nkosikazi Ali. Ocatshangelwa ukuthi wambulala usentilongweni lapho amelele ukuthoniswa icala leli. Ukuze sizwe ngokwethulwe yiHigh Court, sixoxe loMnu. Fortune Mlalazi, ilunga lebandla leCCC othi wenze kahle umthethwandaba lo.
UMnu. Joseph Tshuma owebandla leZanu PF uthi okwenziwe lidale leHigh Court kuveza ukuba imithethwandaba isebenza izimele kwele Zimbabwe.
Forum