Ukhetho lwe by election esigabeni se Nkulumane luzenziwa ngoMgqibelo wona lo phakathi kokudabuka phakathi kwebandla le Zanu PF.
Kodwa lanxa kulokudonselana amandla ibandla le Zanu PF likhanya lizazithaphuzela lesi sikhundla ngoba amabandla aphikisayo amanengi kawasoze angene kukhetho lolu.
Omela ibandla le Zanu PF, uMnu. Killian ubikwa engasoze athole sekelo kubasekeli abathi bafuna ngabe ngowake waba ngumeya, uMnu. David Ndlovu, yena owanqotshwa kukhetho lwama primaries.
Sehlulekile ukukhuluma loNdlovu kunye lo Sibanda kodwa iziphathamandla zebandla leli ezigoqela uMnu. Saviour Kasukuwere zibikwa zitshele umhlangano owenzelwe eNkulumane izolo ukuthi balobufakazi bokuthi kulexuku elisekela uNdlovu elifuna ukuthi lenze okuthiwa ibhola egangeni, okutsho ukuthi abantu bengavoteli uSibanda.
Lesi sikhundla sabakhona kulandela ukufa kukaMnu. Thamsanqa Mahlangu owayelilunga le MDC-T ngenyanga ka Mfufu.
Amacele eMDC lamanye agoqela ele Zapue athi kawasoze angene kukhetho lolu.
Abanye abazangena kulolukhetho ngabathi uMnu. Nngwalo Nyathi owe Progressive Democrats of Zimbabwe lo Sibusisiwe Mpofu owe Reformed Democrats of Zimbabwe.
Inhlanganiso ye Zimbabwe Election Support Network ithi izabe ileziphathamandla ezilitshumi lane, 14 ezizahlola lolukhetho.
Sixoxe lesiphathamandla sebandla le Zanu PF uMnu. Jospeh Ngwenya olilunga le Central committee, uMnu. Joseph Ngwenya ukuze sizwe imbono yakhe ngaloludaba.
“Babesithi ungaze ufake idonki ukuthi livotelwe limele iMDC liyanqoba kodwa ngamva kokuvalwa kwamafekitali abantu sebabona ukuthi hatshi akunjalo,” kutsho uTshuma.
Siphinde saxoxa lowake wamele isigaba se Nkulumane engu senator, uNkosikazi Rita Ndlovu, owebandla le MDC-T.
“Sebeqalisile ukuletha abantu abavela kwezinye izigaba ukuthi bazalobisa ukuvota,” kutsho uNdlovu.