Uzulu weZimbabwe ukhuthazwa ukuba amanyane kungakhathalekile ukuba ungowaliphi ibandla lezombusazwe, alwisane ngazo zonke indlela isinqumo esithethwe ngumthethwandaba, ukuvumela abaqhatshi ukuxotsha izisebenzi mahlayana, okubikwa sekubuyisele muva inguquko esithe yaba khona kudaba lokuthuthukisa amalungelo ezisebenzi kusukela ilizwe lithola uzibuse.
Emhlanganweni lentathelizindaba ngoLwesithathu emini emahofisini abo eBelvedere, abenhlanganiso elwela ilungelo lezisebenzi, eye Zimbabwe Labour Centre, bathi le yiyo kuphela indlela engazwisiswa zinkokheli, abezombusazwe kanye labemithethwandaba. Besithi leli nyathelo selibuyisela muva intuthuko esibe khona ekulondolozeni ilungelo lezisebenzi lokhe ilizwe lathola uzibuse.
Okhokhela inhlanganiso yalabo abasebenza kumankampani abona ngezemihlobo yemililo kanye lamanzi eye Zimbabwe Energy Sector Union unkosikazi Angeline Chitambo utshele intathelizindaba ukuba lesi sinqumo esithethwe ngumthethwandaba we Supreme Court sesibuyisele muva imikhankaso yonke yokulwela ilungelo lezisebenzi.
Wathi unkosikazi Chitambo akusela ngenye indlela ngaphandle kokuba uzulu amanyane, ukulwela lelilungelo eselisusiwe athi yiyo kuphela ndlela engafuqa inkokheli ukuthi ikhangelisise okukhalazwa yizisebenzi ngemva kwalesi sinqumo sikamahluli uChief Justice Godferey Chidyausiku kudaba obeluphakathi kwenkampani yamafutha ezimota eyeZuva Petroleum lezisebesebenzi zayo.
I-ZLC ngenye yenhlanganiso eseziveze umcabango wazo isola isinqumo esithethwe lidale leli ukuvumela inkampani ye Zuva Petroleum ukuxotsha izisebenzi ebezise udaba lwazo edale.
Ingcwethi kwezezisebenzi zithi lokhu yikho osekwandulele ukuxotshwa mahlayana kwezisebenzi ngamanye amankampani akade esesaba ngoba idale selikuvumile ukuba kungenziwa ngemva kokuba ziphiwe inyanga ezintathu zokwaziswa ukuba usuphelile umsebenzi.
Umphathintambo wogatsha lwezisebenzi unkosikazi Prisca Mupfumira utshele idale lephalamende ukuba bakhathazekile ngezehlakalo zokuxotshwa kwabantu imisebenzi mahlayana esezisenkala kulandela lesi sinqumo.
Wengeza unkosikazi Mupfumira ethi khona kuzakuhlalwa phansi kukhulunyisanwe phakathi kwenhlangothi zontathu, eziphatheka kungxoxo zezisebenzi, okubalisa uhulumende, inhlanganiso ezimela izisebenzi kanye labaqhatshi eye Tripartite Negotiating Forum.
Wathi kunje igqwetha elikhulu likahulumende lamanye amagqwetha baphakathi kokubonisana phezu kwalesi sinqumo ukuba kudingwe indlela zokulungisisa loludaba lokuxotshwa mahlayana kwezisebenzi osekuqonge kakhulu ngemva kwalesi sinqumo sedale le Supreme Court.