Ibandla leMDC-T selikhuphe uMnu. Daniel Molokele webandla leMDC Alliance esikhundleni sokuba ngumgcinisihlalo wekhomithi yedale lephalamende ebona ngezemfundo ephezulu eyeHigher and Tertiary Education, njalo endaweni yakhe sokuloNkosazana Lindiwe Maphosa olilunga lalelobandla.
Lokhu kwenzakala lanxa uMnu. Molokele, omela iHwange Central edale lephalamende, engakaxotshwa kulelidale libandla leMDC-T, kulandela isinqumo somthethwandaba weSupreme court esalinika amandla okwenza lokho ngokuthi umkhokheli walelibandla uNkosazana Thokozani Khuphe nguye umholi oqotho wamalunga awayengaweMDC-T isabambene, hatshi uMnu. Nelson Chamisa weMDC Alliance.
Isikhulumeli sedale lephalamende uMnu. Jacob Mudenda wethule umbiko lo ngoLwesine, njalo uthe umeli weSoutherton kulelidale uMnu. Peter Moyo usethethe isikhundla sikaMnu. Charlton Hwende, owaxotshwa kulelidale kusihlalo sekhomithi ebona ngezokwethulwa kwembiko kusetshenziswa imitshina yalezinsuku, eye Communication Technology.
UNkosazana Yvonne Musarurwa weMDC-T usengumgcinisihlalo wekhomithi ebona ngezemvelo eye Environmental Portfolio Committee esikhundleni sika Concilia Chinanzvavana, njalo uMnu. Sipho Makonese usehola ikhomithi yokwethulwa kwembiko eyayikhokhelwa nguMnu. Prince Dubeko Sibanda weMDC Alliance. UNkosazana Khuphe nguye okhokhela amabandla aphikisaya kulelidale kuthi uNkosazana Paurina Mupariwa ukhokhela amalunga, u Chief whip.
Sixoxa loMnu. Mokokele ngaloludaba, yena othi uxotshelwa ukuthi kasekeli uNkosazana Thokozani Khuphe, njengalokho akuxwayiswa ngumphakathi weHwange Central.
Siphinde saxoxa loNkosazana Maphosa ngaloludaba, yena ogcizelela ukuthi isinqumo esithethwe yiMDC-T sifanele njalo uyathokoza ngokuthi ibandla lakhe limbone esifanele lesi isikhundla.