Amalunga edale lephalamende, batshele iqula lenhlanganiso ekhweledisa imali eye International Monetary Fund, elisekwethekeleleni eZimbabwe, ukuthi linhlanganiso ithatha isikhathi eside ukulungisisa ubudlelwano leleZimbabwe ukuze bubuyele esimeni sakudala.
Amalunga la, abumba ikhomidhi yezemali, bathi bakhathazekile kakhulu ngalolu daba, batshela leliqula elikhokhelwa ngumnumzana Domenici Fanizza, ukuba loluhlelo oluqale ngomnyaka ka 2013 ngesikhathi sikahulumende womanyano, seluthethe isikhathi kungekho okwenzakalayo, lona ilizwe selilungiselela ukhetho ingozi kuyikuba kuzakube kungekho ozihlupha ngalo kuzaphazamisa lohlelo lokuvuselela ubudlelwano labamazwe athuthukileyo.
Umgcinisihlalo wale Committee, umnumzana David Chapfika we Zanu PF, uthi kuyinto edanisayo ukuba belulokhe luqhubekiselwa phambili loluhlelo, kungekho okubonakalayo okwenzakalayo.
Omunye wamalunga la, umnumzana Samson Mukanduri,we Zanu PF laye, ukhuthaze abe IMF ukuba bayekethise ukuze eleZimbabwe lanelise ukufinyelela usizo emazweni awomanyano weBretton Woods lezinye inhlanganiso ezitholisa usizo lwemali.
Kodwa uFanizza uthi lanxa ele Zimbabwe litshengise ukuzinikela ukuzilandela iziqondiso zohlelo lwe Staff Monitored Program njalo lanelise ukwethula uhlelo lokuba lizozihlawula lezozikwelede emhlanganweni owenzelwe eLima, kwele Peru nganyanga kaMfumfu nyakenye.
Wengeza ethi kumqoka ukuba eleZimbabwe lenze izivumelwano labezinye inhlanganiso lapho lilezikwelede khona, abalamandla wokuthatha izinqumo kuBoard ye IMF. Wathi lanxa yena labequla lakhe bengayakupha i report enhle phezu kwendlela iZimbabwe iqhuba ngayo, akukho okuhle okungaphuma nxa bungebuhle ubudlelwano lenhlanganiso ezitholisa imali zezikwelede. Ethi izibonelo zitshengisa ukuba okunye kwalokho okuhlupha abenhlanganiso lezi kungelanai lezikweled. U-Fanizza uthi kumele ilizwe liphange likulungisise lokho.
Owake waba ngenye yengcwethi kwezomnotho kugatsha lwezemali,umnumzana Masimba Manyanya, utshele iStudio 7 ukuba kuzwiseseka lokho kukhathazeka kwabameli laba.
Wathi indlela loluhlelo lwe Staff Monitored Program luqhutshwa ngendlela elungileyo,akukho okubonakalayo kungakho bekhathazekile abameli laba.
Iqula le IMF leli liselizweni okwamavhiki amabili ukuzabona ukuba luqhutshwa kanjani uhlelo lokuhlawula izikwelede zelizwe Staff Monitored Program kanye lokuba kubonisanwe beselisiyakwethula i report yalo kuBoard ye IMF, emhlanganweni ozakwenziwa ngenyanga ka Nkwenkwezi.
