Inhlanganiso yeHuman Rights Watch (HRW) ithi abakhokheli beSadc kumele bakhuze uhulumende weZimbabwe phezu kokwephula kwamalungelo oluntu, khona ethi sokufike kuzinga elibi phambilini komhlangano walumanyano ozaqhutshelwa eHarare mhlaka 17 ngoNcwabakazi.
Kumbiko ewethule izolo, iHRW ithe uhulumende kaMongameli Emmerson Mnangagwa uhlukuluza abenhlanganiso ezizimeleyo labamabandla aphikisayo abagoqela umholi welinye lamacele eCCC uMnu Jameson Timba, yena obotshwe ndawonye lamalunga ebandla lakhe angamatshumi phose ayisitshiyangalombili, 78.
UTimba labanye bakhe sebezafikisa inyanga bevalelwe esitokisini bencitshwa i-bail ngemva kokubotshwa besetheswa icala lokuqoqa udlakela, okulicala abalilandulayo.
“Inhlanganiso yeSadc kumele ikhulumisane leziphathamandla [zeZimbabwe] ukuze zithathe amanyathelo acacileyo okuqinisekisa ukuthi amalungelo ayalondolozwa,” kutsho isiphathamandla seHRW eAfrica uMnu Allan Ngari.
“Selokhu wathatha intambo zombuso ngomnyaka ka2017, uMongameli Mnangagwa wephula amalungelo oluntu ngendlea ethusayo njalo usetshengisile ukuthi akazimiselanga ukuletha inguquko ephathelane lokulondoloza amalungelo kazulu.”
UMnangagwa uthi uhulumende wakhe ulobufakazi bokuthi ababotshwayo baqoqa ukubangela udlakela ngesikhathi somhlangano weSadc eHarare, lapho azathatha khona isikhundla sokuba ngumgcinisihlalo walumanyano.
Forum