Umthethwandaba weHigh Court uthi uhulumende kumele adinge uDokotela Peter Magombeyi, okubikwa ukuthi uthunjwe ngabacatshengelwa ukuthi ngamapholisa ensitha ngoMgqibelo.
Umthethwandaba lo uthethe isinqumo namuhla eHarare kulandela ukuphanyekwa kodaba lolu nguNkosazana Elizabeth Magombeyi, udadewabo kaDokotela Magombeyi, othe wesaba ukuthi umnewabo anganyamalala kungaziwa ukuthi wathunjwa ngubani njengalokhu okwehlela uMnu. Itai Dzamara oseleminyaka embalwa engabonakali.
Umthethwandaba uthe inhlangothi zikahulumende ezigoqela owendabazekhaya lowamapholisa ensitha kumele zidinge uDokotela Magombeyi zibike eHigh Court ukuthi kuhamba njani ukumdinga kwakhe njalo kubikelwe lamagqwetha akhe abalisa uAlec Muchadehama, uTinomuda Shoko loPaidamoyo Saurombe abakunhlanganiso yeZimbabwe Lawyers for Human Rights.
Uphinde wathi kumele kufakwe umlayezelo emaphephandaba wokudinga uDokotela Magombeyi.
UDokotela Mthabisi Bhebhe, unobhala jikelele wenhlanganiso yeZimbabwe Hospital Doctors’ Association, uthe kuyadanisa ukuthunjwa kuka Dokotela Magombeyi.
Wethulelokhu emhlanganweni owenziwe ngamadokotela koBulawayo ngoMvulo.
“Sibize umhlangano lowu, sanxusa odokotela bakoBulawayo bonke, sanxusa lama nurse, sanxusa lomuntu wonke jikelele osebenzela igovernment ukuthi sizohlangana lapha sibuza ukuthi uPeter Magombeyi uyengaphi njalo uthethwe ngubani. Okwesibili sizotshela igovernment ukuthi thina asisenelisi ukuthi sibe sibuya emsebenzini ngenxa yokuthi asilayo imali yakhona. Sokumele basiphe imali ekwanayo. Effectively koBulawayo odokotela bonke sebengene ku-strike.”
UDokotela Rodgers Magigo uthi ukuthunjwa komunye wabo kwenze odokotela babe lolaka.
“Sibuthene lamuhlanje lapha koBulawayo siya demonstrator ngenxa yokuthi into enkulu esenze sa demonstrator yikuthi omunye wethu okade ethungamela istrike ebesisenza njengama doctors senyamalele. Kubikwa ukuthi kulabantu abamthetheyo abangaziwayo. Lokhu sokubangele ukuthi amadokotela abe lolaka ngenxa yokuthi isikhathi sesiside bengatholi lenhlawulo efaneleyo engahambelani lomsebenzi wabo onzima … Kodwa bebebuya emsebenzini ngenxa yothando lomsebenzi, lezigulane, labantu beZimbambwe.”
UDokotela Nomalanga Dube uthi bafuna umkhokheli wabo aphenduke ephila ngoba kenzanga lutho.
Kasenelisanga ukukhuluma ngodaba lolu leziphathamandla zikahulumende.
