Lanxa omunye wabakhankasela umbuso wentando kazulu olilunga leMDC Alliance, uMakomborero Haruzivishe obevalelwe okwenyanga ezithile etholiswe ithuba lokuhlawula isibambiso se-bail ngumthethwandaba oweHigh Court, amagqwetha akhe athi ulakho okuqhubeka evalelwe njengoba abatshutshisi besithi ulelinye icala lokuthumba aletheswayo.
Abatshutshisi bathi elinye icala aletheswayo lisemthethwandaba.
Bathi uHaruzivishe wenza lokhu ngesikhathi etshengisela emahofisini awenkampani yeImpala Car Rentals labasakhulayo abebandla leMDC Alliance labenhlanganiso yezifundi eyeZimbabwe National Students Union.
Kuthiwa babefuna abenkampani le baveze igama lomnikazi wemota eyasetshenziswa ukuthumba esinye isifundi, uTawanda Muchehiwa, owatshaywa kabuhlungu ngabacatshangelwa ukuba ngamapholisa ensitha labadlelana lebandla leZanu PF.
UMnu. Simon Chabuka, elinye lamagqwetha kaHaruzivishe, uthi usebenza loludaba loMnu. Lovemore Madhuku.
“Ekuthatheni kwethu loludaba, sitshelwa okokwenza, kasitshelwanga ukuthi ulolunye udaba … Sasesisenza isicelo ngemva kokuba mina loMadhuku siluthethe loludaba.”
Ingcwethi ecubungula ezombusazwe, uMnu. Mlindelwa Mancitsha, uthi okwenzakalayo kuHaruzivishe akubamangalisi.
“So, lokhu kuyinto etshengisayo ukuthi asiyindawo njengelizwe, simi ndawonye. Siyakhohliswa njengabantwana beZimbabwe ukuthi kulento eyenzakalayo, khona kungelalutho.”
Udaba obelukhwezwe emthethwandaba weHigh Court ngolokuthi uHaruzivishe wehluleka ukulandela iziqondiso zakhe ze-baill ngesikhathi ilizwe liku COVID-19 Lockdown, Level 4, lapho abikwa engasayanga zibika khona kwabomthetho esezingenise ku-isolation ngemva kokuhlangana lomuntu owayebikwa eleCoronavirus.
Kodwa uMantshi uDennis Mangosi weHarare unqume ngoMbimbitho ukuba kumele avalelwe uHaruzivishe esithi ngoba wephula ngabomo iziqondiso zakhe ze-bail ayezibekelwe edabeni lwakhe lokuyatshengisela emahofisini enkampani yeImpala Car Rentals. Isinqumo lesi sigenqulwe namuhla ngumahluleli weHigh Court, uJustice Cathrine Mzawazi.