Inengi lithi kusobala ukuthi aqondiswe kumsekeli kaMongameli uNkosikazi Joyce Mujuru amazwi kamka mongameli welizwe uNkosikazi Grace Mugabe awakhulume ngoLwesine eMashonaland Central awokuthi lesi yiso isigaba esilesiphathamandla sebandla leZANU PF esikhokhela olunye uhlangothi lwalelibandla njalo leso siphathamandla sizalahlelwa khatshana njengosane olungafunwa ngunina, yilelibandla emhlanganweni we Congress ozayo.
Ekhuluma emhlanganweni enkundleni yeChipadze Stadium eBindura, kweminye imihlangano ahamba eyiqhuba ezigabeni ezitshiyeneyo zelizwe, uNkosikazi Mugabe uthe kusobala ukuthi leso siphathamandla, angasibethanga ngegama, yiso esibangele ukuthi ezinye iziphathamandla zalelibandla kwezinye izigaba zelizwe zingabuyi emhlanganweni yakhe.
Uphinde wathi abantu bazabakwazi ukuthi amazwi akhe awokuthi “phansi leGamatox” atshoni ngokuya kwesikhathi. Amazwi la uke wawakhuluma emhlanganweni awuqhube enkundleni yeAmazulu Stadium koBulawayo izolo.
Kodwa ekuqhubekeni kwengxoxo uSithandekile Mhlanga weStudio 7 ayiqhube lesiphathamandla se Central Committee yeZANU PF, uMnu. Joseph Tshuma, obesemhlanganweni wakoBulawayo, uTshuma uthi amazwi e gamatox awaqondiswanga emuntwini oyedwa, kodwa kulabo abazama ukudiliza ibandla leZANU PF.
