Abanye abesifazana emaphandleni bathi bebethwele amagabha avuzayo lonyaka ngenxa yokuhlukuluzwa ngabesilisa ezindlini, i-domestic violence, kulandela ukuvalwa kwelizwe phezu komkhuhlane weCovid-19.
Ukukhala kwabo kuza ngesikhathi amazwe omhlaba jikelele agoqela eleZimbabwe ephakathi komkhankaso wokulwisana lokuhlukuluzana ezindlini, owe16 Days of Activism Against Gender Based Violence.
Lanxa abadala besithi induku kayakhimuzi, omama abaxoxe lalumsakazo bathi ikhale kakhulu kweminye imizi lonyaka ngesikhathi seLockdown.
Bathi imbangela yikuxabana obekucina kusiba khona ngoba izimuli bezihleli ndawonye okwesikhathi eside ngitsho lamalunga omndeni avele engaboni ngaso linye, kucine kusiba lokufuthelana okukhulu.
Ngitsho lomanyano wamazwe omhlaba oweUnited Nations uyakufakaza ukuthi ngesikhathi ilizwe liphakathi kokulwisana lokumemetheka kweCoronavirus kube lokuqonga kwezehlakalo zokuhlukunyezwa kwabesifazana lamantombazana emhlabeni jikelele.
