Umthethwandaba waphezulu owe high court lamuhle umise ukuxotshwa kwabantu abahlezi epulazini leArnold Farm Number 10 eMazowe ngoba usithi abadingelwanga ezinye indawo zokuhlala.
Omunye wamagqwetha amela lababantu uMnu. Tonderai Bhatasara utshele iStudio 7 ukuthi lanxa igqwetha likahulumende litshele umthethwandaba ukuthi abantu laba baphiwa enye indawo yokuhlala, umahluli uthe akulabufakazi obuqinileyo obutshengisa lokhu.
Isiphathamandla sikahulumende uMnu.Martin Dinha ulandule imbiko ebisithi umkamongameli uNkosikazi Grace Mugabe nguye oxotshise laba abantu ngoba efuna ukusebenzisa lindawo ukuqhuba inhlelo zakhe.
Abanye abahlala kulindawo bathi badilizelwa amadumba abo njalo sebehlezi egcekeni Kanye lempahla zabo, ngesikhathi izulu lisina, kukanti basebehlanyele izilimo emasimini.
Udaba lolu lwasolwa ngabanengi abagoqela ibandla leMDC elizibiza ngokuthi yiRenewal Team.
Isiphathamandla salelibandla uMnu. Edwin Ndlovu uncome isinqumo somthethwandaba.
