Amalunga enhlanganiso yeMatabeleland Collective athi akulalutho osolwenziwe nguMongameli Emmerson Mnangagwa selokhu kwabunjwa inhlanganiso le nyakenye ejonge ukulungisa okunye okuhlupha abantu eMatabeleland leNkabazwe.
Kodwa-ke uMnangagwa uthembise ukuba uzazama okusemandleni akhe ekuboneni ukuba izikhubeko ziyalungiswa lobanje engacacanga ukuthi uqala nini.
Omunye wabasole uMnangagwa kuyisikhulumi seZIPRA Veterans Trust, uRetired Colonel Buster Willie Magwizi, othi umongameli ubachithela isikhathi ngokuthi uzalungisa udaba lombhuqazwe weGukurahundi, ukuswelakala kwamanzi lokunye.
UMabhalane weGwanda Residents Association, uMnu Bekezela Maduma Fuzwayo, uvumelana loMagwizi.
UNkosikazi Hilgard Mufukare, oweLupane Women’s Development Trust, uthi uhulumende asekwenzile kuphansi kakhulu kulalokho ababe kukhangelele endabeni ezahluzwa emhlanganweni wabo owenziwa nyakenye.
Abasakhulayo labo lokhu behlaba umkhosi besithi bavalelwa phandle kukho konke njalo abantu abasuka phandle kwezigaba zabo yibo abathola imisebenzi lokunye.
