UMongameli Emmerson Mnangagwa uthi uhulumende wakhe uzaqhubekela phambili esebenza gadalala ukuthi umuntu wonke athole ukudla okweneleyo elizweni kungabi lababulawa yindlala.
Wethule lokhu ngoLwesithathu embukisweni weAgricultural Show esipha imivuzo kumbukiso lo.
Uthe uhulumende weZimbabwe uzimisele ukubeka imithetho lokuphuma lenhlelo ezizakwenza ukuba uzulu weZimbabwe athole ukudla okweneleyo.
“Uhlelo lwalonyanga lwenza ukuba sicabange ukuba sisebenza kangakanani kwezokulima ikakhulu ekuthuthukisweni komnotho welizwe.”
UMnangagwa uthi lobanje ilizwe lilenhlupho, ukulima kuyinsika yentuthuko yomnotho welizwe esithi kumele abalimi baqhubeke ngomsebenzi omkhulu abawenzayo.
“Ngesikhathi silungiselela ukulima, kumele sifundisane indlela zokulima ezintsha. Kumele siqhubekele phambili ukuze siphakamise abalimi bethu.”
Ingcitshi kwezokulima, uMnu Mathew Nzima, uthe lobanje kuqakathekile ukuba umongameli atsho imizamo kahulumende eyokuvuselela indlela zokulima, kumele ancedise abalimi abazimiseleyo.
“Uhulumende kudala abantu besifa ngendlala, esihluleka ukulandela abalimi abaphiwa imali ukuba benze umsebenzi. Kuyala ngesikhathi se corona wehluleka ukunceda abantu.”
Ihlandla lalonyaka lalumbukiso liza ngesikhathi abalimi abanengi bekhuthazwa ukuba balime besebenzisa indlela zokugebha amagodi olubizwa ngokuthiwa Pfumvunza/Intwasa kumbe ugatshompo.
Ingcitshi zithi lanxa uhlelo lolu lunganceda, udubo olukhulu oluselizweni yikuba abalimi kabala lwazi olweneleyo olukulima okungasuthisa ilizwe lenkohlakalo ebakhona ekwabelweni kwenhlanyelo lomvundiso phansi kwalolu hlelo lweIntwasa.