Iziphathamandla zikahulumende weMelika lezakweleUkraine zithi ilizwe leli selivumile ukuba kubekwe phansi izikhali inyanga yonke ukuze kulungiselelwe ukuthula kweleUkraine elahlaselwa ngeleRussia kusukela ngomnyaka ka2022.
Lokhu kuphume emhlanganweni oqhutshwe nguMnu. Marco Rubio, umphathintambo wohlangothi lukahulumende weMelika olubona ngokudlelana lamanye amazwe, uMnu. Mike Waltz ongumcebisi kahulumende weMelika wezomvikela, leziphathamandla zikahulumende weUkraine.
Kumbiko owethulwe kusanda kuqhutshwa umhlangano lo kwele Saudi Arabia ngoLwesibili, abamele amazwe la bathe eleUkraine lithi lizimisele ukwamukela okwethulwe ngeleMelika elifisa ukuba kumiswe impi le isicelo seMelika singemukelwa ngeleRussia.
EleMelika lithi lizakhuthaza eleRussia ukuba lemukele lokhu ngezandla ezimhlophe ukuze kumiswe impi le, osokwabulawa abantu abanengi okumangalisayo kusukela ngo2022.
Embikweni lo, eleMelika elamisa okwesikhatshana kunsukwana ezedluleyo ukunika eleUkraine izikhali lokuhambelana lezombusazwe, lithe selibeke lokhu eceleni ngakho-ke selizaqhubekela phambili linika eleUkraine izikhali lokunye okufunakalayo.
UMongameli Volodymyr Zelenskyy wakweleUkraine ubekweleSaudi Arabia loba engahambanga emhlanganweni lo obekuleziphathamandla zikahulumende wakhe ezigoqela umcebisi omkhulu kamongameli uMnu. Andrily Yermak, uMnu. Adrii Sybiha ophethe uhlangothi olubona ngokudlelama lamanye amazwe, uRustem Umerov ophethe uhlangothi lwezomvikela loMnu. Pavlo Palisa umkhokheli webutho.
UYermark okhulume lentathelizindaba kungakaqali umhlangano lo uthe eleUkraine lifisa ukuba livikelwe uma kuzakwenziwa isivumelwano leleRussia, okuthiwa lephula izivumelwano zonke mahlayana.
Akwaziwa ukuba eleRussia lizaphatha njani udaba lolu. UMongameli Donald Trump ufisa ukuba kubekwe phansi izikhali kube lokuthula kweleUkraine lakweleRussia.
EleUkraine ngoLwesibili lihlasele kweleRussia ngendizamtshina ezingamakhulu amathathu ezithwala amabhomba – amadrones. EleRussia lithi kufe abantu abathathu kwalimala phose abangamatshumi amabili kusehlakalo lesi.
Forum