Ugatsha lwendaba zasekhaya kwele South Africa seluqalile ukusebenzisa amakheli ebulenjini ukuthumela impendulo zezicelo ezafakwa ngabalamapermit eZimbabwe Exemption Permit. Kulabafuna ukwengeza isikhathi samapermit la kube labanye abadinga olunye uhlobo lwamapermit okusebenza.
Embikweni owethulwe lugatsha lwendaba zasekhaya liviki, umphathintambo walolugatsha uMnumnzana Leon Schreiber uthe usesungule uhlelo lokuthumela impendulo zezicelo zamapermit kusetshenziswa amakheli ebulenjini beinternet ama-emails. USchreiber uthi izizalwane zeZimbabwe ezafaka izicelo zokwesulelwa okudingakalayo ukungena kwamanye amapermit, amawaiver yizo ezingezokuqala ukuthola impendulo kuma emails andubana loluhlelo lusetshenziswe kunhlangothi zonke. Uthi lelinyathelo ngelokuqala elokusebenzisa impucuko yebulenjini be internet ukwenqabela inkohlakalo eyenzeka kakhulu emahofisini alolugatsha.
“Ukwehluleka ukusebenzisa ubucwephetshe bakulezinsuku ekuhluzeni lekuphendulweni kwezicelo zamapermit yikho okuyimbangela yenkohlakalo enengi kugatsha lwendaba zasekhaya.”
Inengi lezizalwane zeZimbabwe ezilamaphepha la sekuleminyaka emibili egcweleyo zifake izicelo zama waiver lezokwengezelela iminyaka kuma permit eZEP kodwa balokhu bengakatholi impendulo. Kungakapheli iviki uSchreiber ememezele uhlelo olutsha lolu, isizalwane seZimbabwe uMnumnzana Khumbulani Moyo uthi uyitholile impendulo yakhe ngemva kokulinda iminyaka emibili.
“Ngo 31 August 2022 ngangisubmita amapapers wami, So, nga aplayela iwaver ngahlala ngalinda. Ensukwini ezedluleyo ngathola iletter signed by yena uminister omutsha esithi I’m able to apply for igeneral work permit.”
USchreiber uthi ulokhu ephakathi kokucabangisisa ukuthi sizakuba yini isiphetho samapermit eZEP. Kusenjalo, izizalwane zeZimbabwe ezingelamaphepha okuba kwele South Africa zithi phandle sekuzalele ingwe njengoba ugatsha lwendaba zasekhaya lamapholisa sebevala imigwaqo nsukuzonke kuzingelwa abangemamaphepha.
OweZimbabwe ongathandanga ukuvezwa igama uthi ikusasa labo kwele South Africa selisiyangomtsha wendoda.
“Hayi amapholisa wona kulezinsuku siphila ngomusa kaJehova. Bayasidudula mpela abasasifuni. Sesikhulekela ukuthi kulunge ekhaya kodwa hayi iminyaka isimnengi akulungi lutho. Kodwa lezi insuku akungeneki etown bayabopha especially Thursday.”
Ngempelasonto amapholisa eJohannesburg asungule uhlelo lwabo lokubopha izigangi labangelamaphepha. Umeya wedolobho leli, uMnumnzana Dada Morero, laye obekhona kusungulwa loluhlelo uthi kuhle kwabotsha abangelamaphepha abedlula itshumi ngelanga lokuqala laloluhlelo.
“Sifuna ukutshela umphakathi wonke waseJohannesburg sesiqalile manje siyasebenza. Silwisa otsotsi. Silwisa nayo yonke icriminality egcwele la ekhaya.”
Ziphinde njalo zehlisa inyembezi izizalwane zeZimbabwe kwele South Africa liviki ngemva kokubhewuka kwebhasi yeTamuka Coaches eMokopane esabelweni seLimpopo. Kufe abantu abahlanu engozini le elandele eyebhasi yeMzansi ebulele abalitshumi esabelweni esifanayo.
Forum