Umphathintambo wogatsha lwendaba zasekhaya kwele South Africa uthi lolugatsha luzasungula umkhankaso wokungena endaweni zokudlela, ezokwakha lezinye kuzingelwa abasebenza bengelamaphepha okuba elizweni leli.
Ekhuluma ngesikhathi esethula inhlelo zogatsha lwakhe ephalamende ngoMvulo, umphathintambo wogatsha lwendaba zasekhaya uMnumnzana Leon Schreiber uthe lobanje izethekeli zamukelekile ukwethekelela kwele South Africa, abatholakala besebenza kungelamvumo bazawukhomba olotshwala.
Inengi lezizalwane zeZimbabwe kwele South Africa basebenza endaweni zokudlela, emahoteleni, kwezokwakha kanye laku mankampani abomantshingelane. Le yinto ehlezi iqubula olukhulu uthuli izilwane zakwele South Africa zikhalaza ngokuthi babathathelwa imisebenzi. USchreibet utshele iStudio 7 emhlanganweni wabezindaba eCape Town Refugee Reception Centre ukuthi bazaguduza zonke lezi indawo kubuthwe bonke abangelamaphepha.
“Sifuna umhlaba wazi ukuthi izethekeli zonke zemukelekile kodwake labo abephula imithetho angeke sibayekele yikho nje sizabazingela kulezi indawo.”
lnkulumo kaSchreiber le isiyethuse kakhulu izizalwane zeZimbabwe.
Isizalwane seZimbabwe uMfundisi Louis Guduza uthi akavumelani lenkulumo yokuthi abeZimbabwe abasebenza kulezi indawo bathathela abanye imisebenzi.
“Kanti vele kuze kuyesetshenzwa emarestaurants kwakuhambe njani? Ngoba vele ngumsebenzi wamaforeigners lokhu ukusebenza emgwaqweni lokhu, ukwakha izitina ngumsebenzi wamaforeigners lengadi ngumsebenzi wamaforeigners. What has happened now osekucosta ukuthi kuthiwe bathathela abantu imisebenzi ngoba yimisebenzi evele bengayifuni.”
UMnumnzana Dumiso Gama yena uthi okubahluphayo yikuthi iziphathamandla zeSouth Africa zenza sengathi azikwazi ukuthi yindaba elizweni lazo kugcwele abeZimbabwe abangelamaphepha.
“Sihlukunyezwe kakhulu sakhuluma ukuthi siyahlukunyezwa kodwa okuyisimanga yikuthi ohulumeni basapotana legovernment eyiyo ehlukumeza abantu. Siyabalekake sigcwala amathafa siyalapho esicabanga ukuthi sizophila sibuye siyazingelwa.”
Esinye isizalwane seZimbabwe uMnumnzana Mlungisi Tshabalala uthi alikho iqhinga ngaphandle kokuthi abeZimbabwe abakwele South Africa benze imizamo yokuhlala ngokusemthethweni.
“Asingakutsho thina yikuthi abantu bakithi abaqhubeke bethatha izincwadi bebelalezo ncwadi ezidingakalayo. Abalamapermit, amawaiver bahlale bekuphethe nxa besiya emsebenzini. Angeke thina satshayela iSouth Africa umthetho ukuthi benzeni ngasebekhethe ukukwenza.”
Kusenjalo, uSchreiber utshele iStudio 7 ukuthi uzimisele ukusombulula udaba lwamapermit aphiwa izizalwane zeZimbabwe awe ZEP ngendlela esemthethweni njalo elandela isinqumo somthethwandaba wesisekelo sombuso.
Lumthethwandaba umise ukwesulwa kwamapermit la usithi indlela owayengumphathintambo wogatsha lwendaba zasekhaya uMnumzana Aaron Motsoaledi abezama ukwesula ngayo amapermit la kayizange ilandele umthetho. USchreiber uthi uzakhulumisana labeZimbabwe laba engakathathi isinqumo ngekusasa yala mapermit.
Forum