EleChina seliphindisele phezu kwemithelo yokuthengiselana eliyetheswe nguMongameli Donald Trump weMelika lalo lafakela izinto ezivela eMelika ezigoqela amafutha e-gas lamalahle umthelo wokulitshumi lanhlanu ekhulwini, 15 percent.
Uhulumende weChina wazise ngoLwesibili ukuthi amafutha e-oil avela eMelika, izimota kanye lemitshina esetshenziswa kwezokulima layo izahlawulelwa umthelo wokulitshumi ekhulwini, 10 percent.
UMongameli Trump nguye oqale ukwethesa impahla evela kweleChina, eMexico laseCanada imithelo esithi uhlose ukuvikela amabhizimusi eMelika.
Uthe njalo ufuna eleCanada leleMexico avimbe ukungeniswa mahlayana kwezidakamiswa eMelika yizigebengu ezisebenzisa imingcele yawo.
Amazwe womabili lawo aphindisele ngamanyathelo afanayo.
Kodwa abaholi beMexico leCanada basuke bakhulumisana loTrump bavumelana ukuqinisa imingcele yamazwe abo lokumisa imithelo le okwenyanga kusakhulunyiswana.
EleChina lona akukazakali ukuthi lizakhulumisana njani loTrump. Kodwa lithi selikhweze udaba lolu kunhlanganiso elawula ukuthengiselana emhlabeni wonke jikelele, iWorld Trade Organization.
Olandela okwenzakala eMelika uMnu Washington Jamela utshele iStudio 7 ukuthi imithelo le yindlela kaMongameli Trump yokuphoqa amazwe lawa ukuthi athole akufunayo.
Forum