EleBotswana selihlola abangena elizweni leli umkhuhlane wempunza ye-mpox ukwenzela ukuba ungamemetheki njengalokhu okwenzakala kwamanye amazwe akuzwekazi leAfrica. Abaphila ngokuthenga bethengisa impahla etshiyeneyo bathi lokhu kulakho ukuphazamisa amabhizimusi abo.
EleBotswana ngoMvulo lisungule uhlelo lokuhlola izihambi ezingena elizweni ukuze libe lesiqiniseko sokuthi abalamkhuhlane osubhahile owe-mpox.
Umkhuhlane lo umemetheke kakhulu kwele Democratic Republic of Congo, njalo usubulele abantu abathathu kwele South Africa. Abantu abanengi bathithibele besithi uma kungahlelwanga kahle ulakho ukumemetheka emhlubulweni wangezansi kwezwekazi leAfrica.
Ngalokho umphathintambo wezempilakahle kwele Botswana, uDokotela Edwin Dikoloti, uthi bonke abangena elizweni leli bazahlolwa emingceleni.
“Noma singakabhalisi muntu olomkhuhlane we mpox, sesiqinise ukuhlola kwabangena emngceleni kanye labafikela egcekeni lendizamtshina.”
Okhokhela ugatsha olubona ngezempilakahle kazulu olweBotswana Public Health Institute, uDokotela Thebeyame Matsheka uthi izihambi emngceleni labafikela emagcekeni endizamtshina, bazaphendula imbuzo ethile.
“Ukuhlola abantu abangenayo kuzabona bephiwa amaphepha lapho abazaphendula imbuzo nge mpox. Kodwa uma utshengisa impawu zalomkhuhlane, sihle sikukhangele khonapho.”
Amanye amazwe emhlubulweni wangezansi kwezwekazi leAfrica, okugoqela eleZimbabwe, lawo akhangelelwe ukuthi afake imigoqo yokuvikela ukumemetheka kwe-mpox. Umkhuhlane lo usulethe ukungahlaliseki okwabonakala ngesikhathi esisanda kudlula kuze kuqhamuke igciwane leCovid-19.
Lokhu kulakho ukuphazamisa ezamabhizimusi kanye lokwehla kwenani lezethekeli.
Kodwa umqondisi wenhlanganiso yeSouthern Africa Development Community Business Council Tourism Alliance, uMnunzana Tshifhiwa Tshivhengwa, utshele iStudio7, ukuthi abaqhuqhi kangako ukuthi i-mpox ingaphazamisa ibhizimusi.
“Umlayezo wethu ulula, sivulile kwezebhizimusi, njalo sizaqhubeka sivulile, isimo siyalawuleka.”
Kodwa okhokhela inhlanganiso yabaphila ngokuthenga lokuthengisa eyeBulawayo Vendors and Traders Association, uMnunzana Michael Ndiweni, uthi i-mpox ilakho ukuphazamisa ibhizimusi.
“Sekungabayingozi ukuthi kungethusa abantu abaphila ngokuyadinga imphahla eBotswana. Kodwa sike sabalapha ngesikhathi seCovid ayisiyonto entsha.”
UNdiweni uxwayisa amalunga abo kanye labanye abaphila ngokuthengisa ukuthi bawode imphahla ebulenjini beinternet ukuze bayehlise inhambo zokuchapha imingcele yakwamanye amazwe.
“Sekumele abantu baqinise ukuthenga imphahla online kumbe basebenzise ama agents ukuze kuyehlise ukuhamba okungadingakaliyo. Njalo ukuthenga ebulenjini kuyayehlisa intengo yokuhamba noma nje sesijayele ukuthi siyezithengela imphahla.”
Ukumemetheka komkhuhlane we-mpox sokwenze ukuthi inhlanganiso ebona ngezempilakhle emhlabeni wonke jikelele, eyeWorld Health Organisation ukuthi ikhiphe isixwayiso sokuthi umkhuhlane lo kumele uphathwe njengomkhuhlane oyingozi ophazamisa ezempilakahle.
Impunza ye-mpox isubulele abantu abedlula amakhulu amahlanu - 537 emhlabeni wonke jikelele. EleBotswana lele Zimbabwe ngamanye amazwe angezansi kwezwekazi leAfrica angakabi lomuntu osebanjwe ngumkhuhlane lo. Lokhukubikwa ngabezempilakahle emazweni la.
Forum