Ukuxotshwa kukamphathintambo obebona ngezabalwa impi yenkululeko kubandla leZanu PF uMnu Chris Mutsvangwa sokuphehle umbono wokuthi lokhu kungaba yikuqala kokubhidlika kwamaphupho kaMnu Emmerson Mnangagwa okukhokhela ilizwe nxa uMongameli Robert Mugabe esesukile esihlalweni.
UMutsvangwa uxotshwe yisigaba sakhe seMashonaland West esetheswa icala lokweyisa uMugabe kanye lokuxabanisa amalunga ebandla. Inkokheli yeZanu PF ikhangelelwe ukwethula isinqumo sokuthi uMutsvwangwa axotshwe kokuphela.
Umkakhe uNkosikazi Monica Mutsvangwa laye ulakho ukuxotshwa. Ababili laba ngabantu ababikwa bekucele likaMnangagwa, lona elilwisana lelizibiza ngokuthi yiG40.
Abanye banakanela ukuthi uMnu Mnangagwa engazithola esexotshwa kubandla leli ngendlela owayengumsekeli kaMugabe, uNkosikazi Joyce Mujuru axotshwa ngayo.
Kodwa ingcwethi kwezombusazwe uMnu Mqondobanzi Magonya uthi kaboni uMnangagwa exotshwa lanxa nje abamsekelayo sebeqalisile ukuhlukuluzwa.
"Angiboni ukuthi kukhona uMugabe angakwenza kuMnangagwa ngokwazi kwethu sonke ukuthi abayibona abathonta igazi laMaNdebele, nguMugabe loMunangagwa," kutsho uMnu Magonya.
