Abantu abanengi abalandela ukholo lweSiKhristu kanye labathakazelela ikhefu lePhasika belandela amasiko abo bathi kunzima ukulinanza lonyaka ngenxa yokuthi umhlaba wonke jikelele uzama ukuvimba ukumemetheka komkhuhlane weCoronavirus COVID-19 osubulele inkulungwane ezedlula amatshumi ayisikhombisa.
Abantu bajayele ukukhonza uNkulunkulu bendawonye, ukuhlangana lezihlobo labangane kudliwe ezifela emlonyeni njalo kunathwe amanamunede lotshwala nxa kunanzwa ikhefu lePhasika.
Kulabanye abajayele ukuhlaba imbuzi kumbe inkomo labagijimisa inkukhu egumeni kuthunqe uthuli ngekhefu lePhasika. Konke lokhu akukho lonyaka njengoba uzulu ecatshele umkhuhlane weCoronavirus COVID-19 ezindlini.
Umkhuhlane lo usubulele abantu abalitshumi lane eZimbabwe. Loba bekhala abalandeli bokholo lweSiKhristu, kulabanye abathi lesi yisikhathi sokukhuluma loNkulunkulu umuntu munye ngamunye.
UMfundisi Wendy Simango uthi abantu okwamanje kumele bakhulumisane loSomandla njengoba umhlaba uhlaselwe ngumkhuhlane weCOVID-19.
UMfundisi Simango uthi kuqakathekile ukuthemba uNkulunkulu sonke isikhathi.
Kodwa uMfundisi Bright Shayanowako oweVisionary of Graceline Ministries udane okumangalisayo ngokwenzakala lonyaka ngekhefu lePhasika.
Kuthi njalo uMfundisi Wyson Dutch oweUnited Evangelical Church in Zimbabwe ukhuthaza amakholwa ukuba aqine kwezokukhonza uNkulunkulu ngales’isikhathi.
Loba kunjalo, kulabanye abasemsebenzini ngesikhathi sekhefu lePhasika. Omunye wabo nguMnu. Leopold Munhende, intathelizindaba esebenza izimele. Uthi okudanisayo yikuthi bahlukuluzwa ngamapholisa lamasotsha.
Isikhulumeli samapholisa uAssistant Commissioner Paul Nyathi uyakuphikisa lokhu esithi kabalazinqumo zokuhlukuluza intathelizindaba. Uthi bazaluhlolisisa udaba lolu. Kusenjalo, uNkosikazi Sazini Mangena, ohlala eDamafalls eHarare, uthi ubhoda nsukuzonke edinga ukudla kwemuli yakhe ngakho kasoze alikholise ikhefu lePhasika.
Uzulu weZimbabwe uphakathi kokucatshela umkhuhlane weCoronavirus osobulele abantu abanengi emhlabeni wonke jikelele. Kukhanya umemetheka umkhuhlane lo eZimbabwe.
