‘Isilukhuni Impilo Ngenxa Yomkhuhlane weCOVID-19’
Izakhamizi zakoBulawayo zithi zibhekane lenhlupho ezitshiyeneyo ngesikhathi eleZimbabwe lilwisana lokuvimba ukumemetheka komkhuhlane weCOVID-19 osubulele abedlula inkulungwane lengxenye – 1,576.
Uhlangothi lwezempilakahle lubika ukuthi sebedlula ingxenye yesigidi – 509,274 abantu eZimbabwe asebehlatshwe okwakuqala amajekiseni okuvuselela amasotsha omzimba okulwisana legciwane leCOVID-19. Asebehlatshwe okwesibili bafika phose inkulungwane ezilikhulu lamatshumi amahlanu – 148,564. Luthi kulabantu abalitshumi lanye – 11 abahlolwe izolo batholakala beleCOVID-19.
Sokulomnyaka bethwele nzima abantu ngenxa yomkhuhlane lo. Banengi abakhala ngomkhuhlane weCoronavirus. Omunye wabo nguMnu. Ambrose Sibindi, okunhlanganiso yezakhamizi eyeBulawayo Progressive Residents’ Association.
“Siyananzelela ukuthi ngales’isikhathi somkhuhlane weCOVID-19 izakhamIzi zakoBulawayo ezinengi zithwele nzima. Sinanzelela ukuthi amankampani amanengi abale lesikhathi sokuthi ayevalile amanye esebenza okwensuku kodwa ikakhulu laba abathwele nzima yilaba abazisebenzayo. Abantu abanengi badonsa nzima osokusitsho ukuthi abantu kabasenelisi ukubhadala ama rent ezindlini, abanye ukuthi babhadale ischool fees sokunzima, loba ukuhamba esibhedlela sekunzima.”
Lokhu kusekelwe nguMnu. Matthew Sibanda, othi abantu abanengi kabalamisebenzi koBulawayo.
“Lokhu kuwise izinto ezinengi. Amankampani amanengi avaliwe, abantu abanengi abasasebenzi bamiswe imisebenzi kundawo ezinengi. Thina eZimbabwe silohlupho lokuthi uhulumende kasincedisi ngalutho. Okwakhe yikuthi abe efaka imigoqo yokuthi abantu bengayi le lale, imota zabantu kazingalayitshi. Ngikhuluma kanje amapholisa axotshana lezimota zabantu. Sibonile lezikolweni ukuthi abantwana babanjiwe umkhuhlane lowu kodwa uhulumende kazamanga ukuthi afake izivikelo zabantwana ezokusebenzisa kanye labotitsha.”
UNkosikazi Pretty Mpofu, ophila ngokuthengisa impahla etshiyeneyo, uthi uphila ngentando kaNkulunkulu.
“ICOVID-19 leyi ilethe ukuhlupheka, ilethe ukungazwanani, ukuhlala kuxatshanwa ezindlini. Obaba ezindlini nxa bengela mali balolaka, ngakho iCOVID ilethe ama challenges amanengi kakhulu. Besijayele ukuvuka siphandaphanda kodwa khathesi sekufanele ukuthi sitshintshe, lokudla sesisidla kanye ngelanga. Sesiphongu kwamukela usuku ngosuku nxa lufika, sisithi ukuphila yikho kuphela okuqakathekileyo.”
Umongikazi, uNkosikazi Easter Nxumalo, laye uthi uthwele nzima. Ukhuthaza abantu ukuba bahlatshwe amajekiseni anjenge Sinopharm, Sinovac lamanye ukwenzela ukuzivikela lokuvikela uzulu kumkhuhlane weCOVID-19.
“Ngesikhathi lesi somkhuhalne lowu weCOVID-19 ngani abantu sebejayela ukugqoka ama mask laloba nje bekhona bonalaba abangawagqokiyo. Siyananzelela ukuthi uzulu usekwamukele ukuthi sekumele ahlale egqoke imask, ahlale esanitizer izandla. Lanxa kambe olunye uhlupho esingabe singalubona ngolwe social distancing, ngoba izikhathi ezinengi abantu bacina bezibona vele sebengasalandeli isiqondiso leso esokuthi bengaminyani.
“Kodwa thina njengabezempilakahle umlayezo wethu lokhe ungaguqukanga. Sithi abantu kabahlale begqoke ama-mask, abantu kaba sanithayize, abantu kabazame ukwenza i-social distancing lapho abakhona.”
UMongameli Emmerson Mnangagwa lezinye iziphathamandla zikahulumende, bakhuthaza abantu ukuba bahlatshwe amajekiseni okuvimba ukumemetheka kwegciwane leCOVID-19. UMnangagwa, umsekeli wakhe uRetired General Constantino Chiwenga labanye sebahlatshwa amajekiseni okulwisana legciwane leCOVID-19.
Uhlangothi lwezempilakahle lubika ukuthi sokulabantu abafika phose inkulungwane ezingamatshumi amane – 38,414 asebehlolwe eZimbabwe kusukela ngoMbimbitho nyakenye batholakala belomkhuhlane lo. Abedlula kancane inkulungwane ezingamatshumi amathathu lasithupha – 36,052 sebaphepha kumkhuhlane weCOVID-19.