Umkhuhlane weCoronavirus uqhubekela phambili umemethela emhlabeni jikelele, uthatha impefumulo yabanengi mihla ngemihla.
Lanxa eleBhilithane, njengawo amazwe womhlaba liphakathi kokulwisana lokuvimba ukuthelelanwa kwalumkhuhlane ngesiqhubu esikhulu, kulabanye asebethethwe yiwo, abagoqela ezinye izizalwane zeZimbabwe eziphakathi kwenani asebebulewe yiCovid 19.
Solulamaviki adlula amabili uhlelo olweBhilithane lokuthi abantu bahlale ezindlini benganyakazeli, kodwa inani labasebebulewe yilumkhuhlane liqhubeka liqonga mihla ngemihla, nanku lenhloko kahulumende, uMnu. Boris Johnson, usesibhedlela ngemva kokufunyanwa eleCoronavirus.
UNkosazana Sandra Nyoni, isizalwane seZimbabwe esesihlala eBhilithani, ubhujelwe ngumalumakhe ngomkhuhlane weCOVID19 edolobheni leBirmingham lapho okuthiwa wezwa sephethwe likhanda loqhuqho.
"Wacina engaselamandla, umkakhe wamgijimisela esibhedlela seBirmingham. Salandela ukuthi siyembona kodwa basalisa kunye lomkakhe waliswa ukungena. Asizange simbone egula kucine sesibona ngamapholisa afikendlini besitshela ukuthi umalume kasekho mhlaka 3 April. Asikwazi lokuthi senzeni silinde ukuzwa kuGovernment, ngilomkakhe labantwana ababili akulakubuthana okukhona and angazi kuyathiwani. Sidabukile bhudi ngiyaxolisa."
Abanye kodwa bayaphepha kulumkhuhlane, njengoMnu. Menis Ndlovu, ohlala edolobheni leLondon obehlaselwe yileligciwane leli kodwa sengcono.
"Okungumkhuhlane lokhu sekwake kwangihlasela ke lami lokhu esikuthi yiCoronavirus lokhu. Ngilethemba lokuthi kungihlasela nje ngenxa yokuthi ngengombalisi, sihlangana labazali abanengi, labantwanana abanengi abatshiyeneyo lokhu lalokhuyana, so kungenzakala ukuthi khona ngikuthethe khonapho ke lokhu okungumkhuhlane. Pho ngithe sengikutholile lokhu okungumkhuhlane sengisizwa hawu nanku umphimbo wami usitshisa tshisa lapha, nanti ikhanda selingitshayatshaya, hawu dukuduku sengikhwehle khwehlela. Kanti sokutheni lapha."
Uthi kwabakubi uNdlovu sokumphethe kakhulu udokotela wakhe wacina esithi kahanjiswe esibhedlela.
Umfundisi omkhulu weMethodist Church uReverend Chaplain Cleopas Sibanda uphatheke kabanzi kulezinsuku eduduza njalo ekhulekela abafelweyo labahlaselwe ngumkhuhlane lo.
"Lama Zimbabweans lawo aselahlekelwe yimpilo ngenxa yomkhuhlane lowo okuthiwa yiCOVID-19. Thina njengabanali sihlangana labantu abanengi abagulayo, abafelwayo labo siyakhuleka nabo sisebenzisa isocial media njalo siyakhuleka nabo sisebenzisa even amafoni. Sifonelwa njalo ngabanengi abalezihlobo ezigulayo sibe sesikhuleka nabo sibancedisa ukuthi bakwanise uku coper kulesiskhathi esinzima kangaka."
UMfundisi Sibanda ngaphandle kokuthandazela uzulu, ukhuthaza abantu bonke ukuthi balandele izixhwayiso ngalumkhuhlane.
"Ngicela mahlabezulu silalele okutshiwo ngabezempilakahle lapha esihlala khona,kanye lokutshiyo nguhulumende lapha esihlala khona ukuze sivikele ukumemetheka kwalomkhuhlane kakhulu ekuhlalisaneni ezindlini kulockdown, kube lokuhloniphana kube lokuhlalisana kuhle abantu bethokoza bejabula. Inkosi ibenathi inkosi isgcine inkosi engumalusi njalo eyiphephelo sethu ibelathi ngalesiskhathi sobunzima. Enguthembisayo ebantwini bonke, yikuthi ngo Jesu sizanqoba kuze kubephakade. Amen."
Umkhuhlane weCOVID19 usubulele inkulungwane lenkulungwane zabantu njalo usuhlasele abantu abedlula isigidi lengxenye emhlabeni wonke jikelele.
ICOVID19 ayikhethi simo somuntu emphakathini, ayikhethi mhlobo, loba uhlangothi, iyabulala ngakhoke ingcwethi zezempilakahle zixwayisa abantu ukulondoloza ukuhlanzeka ngokugeza izandla sikhathi sonke, ukulandela iziqondiso zokuhlala ezindlini, bengayi endaweni eziyabe zinyakazela abantu, bengabuthani njalo balondoloze ukuhlanzeka okwezinga laphezulu.
