Abanye abantu bayesaba ukuthi impahla ilakho ukuswelakala nxa kungabiselwa intengo yempahla eyayikhona mhlaka ngoMbimbitho lonyaka njengalokhu okusanda kwethulwa ngumsekeli kamongameli, uMnu. Kembo Mohadi.
Kulabanye njalo abathi kungaba kuhle kakhulu nxa lokhu kungenziwa ngoba akusathengeki impahla ezitolo kulandela ukukhuphulwa kwentengo yayo kusanda kwethulwa uhlalo lokuhlala ezindlini kusenzelwa ukunqabela ukumemetheka komkhuhlane weCoronavirus COVID-19.
UMohadi, okhokhela iqula labaphathintambo bakahulumende elibizwa ngokuthi yi-Interministerial Taskforce on COVID-19 Response Team, uthi bathethe isinqumo lesi besenzela ukunceda abaswelayo.
Uyinye yempahla ekhuphulwe intengo igoqela isinkwa, itshukela, amafutha okuphekisa lefulawa.
Unobhala jikelele wenhlanganiso emela izisebenzi yeZimbabwe Congress of Trade Unions, uMnu. Japhet Moyo, okwethulwe nguMohadi kulakho ukuthi kwenze kubelokusilela kwempahla enengi eZimbabwe.
“Singazi ukuthi lokho uhulumende athe akwehle sizaqhubeka sikuthola yini emashop. Esikhathini esedluleyo besibona usomabhizimusi nxa sethe uhulumende kabayehlise intengo izinto ezinengi zisuka-ke ziswelakale ezitolo besezitholakala emkambo wensitha owe-black market. Singazi ukuthi okwamanje osomabhizimusi bavumile yini lokhu. ”
Uthi kuyadingakala ukuthi kube lendlela yokuthi osomabhizimusi labo bathole usekelo.
Isiphathamandla senhlanganiso elwela amalungelo abathengi eyeNational Consumer Rights Association, uMnu. Effie Ncube, uthi lanxa lincomeka lelinyathelo likahulumende kumele alilandele ngonanzelelo.
“Kodwa angayi ngenkani, angayi ngomthetho afike athi yehlisani intengo yezinto ngoba ziyavuka sezingasekho lezo zinto. Kuhle-ke ukuthi abone ukuthi uyakhulumisana labomabhizimusi ukuze lokho abakhala ngakho kulungiswe. Labathengayo kulungiswe lokho abakhala ngakho … Kutholakale izinto zikhona ngentengo eyeneleyo hayi ukuthi zehliswe izinto zicine zingasekho ezitolo. Kumele kudingakale indlela yokuthi konke kutholakale kukhona.”
Isakhamuzi seMilton Park eHarare, uMnu. Collins Ncube, usola uhulumende esithi uphuzile ukuthatha leli nyathelo.
“Uzama ukubhula umlilo osuvele subhebha kakhulu ngoba nxa sikhuluma sisithi khona ama basic commodities ama prices abuyele from 25 March esizibuza khona yikuthi izinto zona lezi zivele ziyalungiswa yini khathesi sikhuluma sinje njengoba umnotho welizwe siyazi sonke ukuthi izinto ezinengi sizithola kwamanye amazwe. Imingcele ivaliwe eyemazweni angomakhelwane. So, engizibuza khona yikuthi nxa sisithi kakubuyiselwe ama prices kunjengokuthi ayenjani ngo25 March into zakhona zilungiswa ngubani engaphi.”
Uphenyo olwenziwe nguhulumende nyakenye luveze ukuba imuli kumele ibe lenkulungwane phose ezinhlanu zamadollar (WL$4,65.00) ukuthenga konke okudingakalayo empilweni.
Kodwa kuthe kusiyafika umhla ka 11 Mabasa ibisikhuphuke yaya kunkulungwane phose eziyisikhombisa (ZWL$6,660,84) ukuthenga impahla yinye.