Coltart: IZimbabwe Kumele Ibe Lilunga LeICC

WASHINGTON DC —  Umphathintambo wezemfundo uMnu David Coltart uthi isizatho sokuthi eleZimbabwe lale ukusayina isivumelwano esasungula umthethwandaba womhlaba oweInternational Criminal Court (ICC) yikuthi kuleziphathamandla ezesaba ukubotshwa ziyethonisiswa ngamacala okubulala kanye lokwephula ilungelo loluntu kuwo.

UColtart wethule amazwi la emhlanganweni oqhutshelwe eRome oweConsultative Assembly of Parliamentarians for the ICC.

Umthethwandaba lo wasungulwa yisivumelwano seRome Statute esimele sisayinwe ngamazwe azinikela ukuhlonipha ilungelo loluntu.

Kodwa eleZimbabwe lamanye amazwe afana leMelika kakasayini lesisivumelwano.

Umlandu weICC ngowokubopha lokuthonisisa bonke abetheswa amacala okubulala abantu abanengi, iGenocide kanye labadala amacala empi.

Asebebotshwe yilumthethwandaba bagoqela owake waba ngumongameli weLiberia uMnu Charles Taylor.

Iziphathamandla zeZanu PF ezinengi zetheswa icala lokubulala lokudala amacala empi ikakhulu ngesikhathi seGukurahundi.

UColtart uthi amacala anje yiwo abangangela ukuthi iZanu PF yale ukuzinikela kuICC.

Sixhume ingcwethi ecubungula ezombusazwe uMnu Rejoice Ngwenya yena othi iZimbabwe kumele isayine isivumelwano lesi ibelilunga leICC.