Umphathintambo wezemithetho uMnu Patrick Chinamasa uthi uhulumende uzahlonipha isinqumo somthethwandaba weSupreme Court ngokuqhuba ukhetho lwama By-elections ezigabeni zonke zelizwe ezingela bammeli edale lephalamende, kuSenate lakumakhansili.
Umthethwandaba lo unqume ngeviki edluleyo ukuthi uMongameli Mugabe kumele ehlele ilanga okuzakwenziwa ngalo ukhetho lokudinga abammeli bedale lephalamende eNkayi South, Bulilima East leLupane East.
Isinqumo lesi size ngemva kokuba ababemela lezindawo, bona asebaxotshwayo kuMDC ekhokhelwa nguMnu Welshman Nube becele umthethwandaba ukuthi ubambe uMugabe ngamandla ukuthi abize ukhetho kulezizigaba.
UChinamasa utshele idale leSenate ngoLwesine ukuthi lanxa isinqumo somthethwandaba siqondane lezigaba zontathu, silomthelela kuzo zonke izigaba ezingamatshumi amathathu lathobaminwe mibili, 38 ezingasela bammeli kuSenate lakuHouse of Assembly.
Ngalokho, uMnu Chinamasa uthi ukhetho kumele lwenziwe kuzo zonke lezizigaba kanye lekundawo ezingamakhulu amabili ezingasela makhansila.
Wengeze wathi ukhetho lolu kumele lwenziwe umnyaka ungakapheli. Uthe kudingakala imali engange $40 million yokuqhuba lumsebenzi. Akukacaci ukuthi amabandla akuhulumende athi iZanu PF lamacele womabili eMDC avunyelwe yini ukuncintisa kukhetho lolu.
Ekubunjweni kwaluhulumende amabandla la avumelana ukuthi kasoze ancintisane kukhetho lwamaby-elections okomnyaka emizameni yokungathunuki amanxeba ayelokhu ebhibhidla ebangelwe ludlakela luka2008.
Lokhu kutsho ukuthi isikhathi isivumelwano lesi okwakumele sisebenze ngaso sesadlula.
Kodwa iMDC ekhokhelwa nguMnu Welshman Ncube ithi amabandla womathathu avuselela isivumelwano lesi emhlanganweni weSadc Troika owenzelwa eMaputo, avumelana ukuthi kamelanga ancintisane kuma by-elections uhulumende womnayano aze afike emphethelweni.
Lokhu kufakazwe ngumqondisi okhangelane locwaningo kulelibandla, uMnu Qhubani Moyo.
Kunjalo nje, umgcinisihlalo weZimbabwe Electoral Commission, uMnu Simpson Mutambanengwe utshele istudio 7 ukuthi ikomishin iyakhe ilulungiselele lolokhetho.
Kodwa uthe usazohlangana lomphathintambo wezemali uMnu Tendai Biti kanye loChinamasa bekhulumisana ngodaba lolu.
