Inhlanganiso yeZimbabwe National Family Panning Council iqhuba uhlelo lokuhlola uzulu imvukuzane yebele kuliviki kungela nhlawulo. Kusenjalo, ikhansili yakoBulawayo yamukela izipho zendawo zokulahlela izibi ezamabhini.
IZimbabwe National Family Planning Council iqale umkhankaso wokuhlola imvukuzane yebele ngoMvulo. Ikhangelelwe ukuba izaphetha uhlelo lolu kusasa koBulawayo esibhedlela seMpilo kanye laphakathi kwedolobho eLister Clinic. Umkhankaso lo wenziwa kungela nhlawulo. Inhlanganiso le ithi iyahlola kuphela hatshi ukwelapha abantu. Nxa umuntu engatholakala elemvukuzane uphiwa incwadi elempumela yalokhu okumele ayinike izibhedlela ezelaphayo kumbe kunhlanganiso eziphathisa uzulu ekwamukeleni isimo sakhe.
UMnu. Mission Gwafa, isikhulumeli senhlanganiso yeZimbabwe National Family Planning Council, uthi uhlelo lolu lugqhitshwa ngoLwesihlanu.
“Silomkhankaso omkhulu oqala mhlaka 11 kusiya mhlaka 15 lapho esiyabe sihlola khona lokufundisa ngomkhuhlane wonalowu owe Cancer of the breast kungela mbadalo, njalo sixwayisa nge cancer of the cervix le prostrate. Silezinye inhlelo esizabe sizinikeza mahala, injection ye Family planning, amaphilisi awe secure anathwa ngomama abamunyisayo, i loop konke lokhu yimahala. Kulemfundiso ekhona, wozani lemibuzo sizoxoxa ndawonye. Sinxusa njalo abatsha abasakhulayo abale 10years kusiya ku 24years kulezifundo ezimnandi eziphathelane lokukhula lokuzigcina lokuhlonipha umphakathi.”
UGwafa uthi inhlelo zabo lezi kazibangeli imvukuzane ngakho-ke uzulu kakhululeke azisebenzise.
“Thina njenge ZNFPC siyakwazi ukuthi kunzima ukuthi abantu bamukele umkhuhlane wonalo. Yikho umkhuhlane umemetheka, abantu bathatha isikhathi eside bengahlolwanga ngenxa yenkulumo ezikhona, ama myths okwenza ukuthi abantu bayedinga usizo kwezinye indawo.Thina senza ama examinations, singahlola sibe sesiku refer kuma Organisation lezibhedlela esisebenza lazo. Njalo akula ndlela eze family planning ezibangela umkhuhlane wemvukuzane yamabele, so abantu basafe ukuthi bawasebenzise.”
UNkosikazi Ruth Zulu, umhlali wakoBulawayo ohlolwe kungelanhlawulo eMpilo Hospital, ujabule kakhulu esizwa ngohlelo lokuhlolwa kungelanhlawulo.
“Khathesi okwenzakale eMpilo ukuthi sihlolwe iBreast Cancer mahala siyakubongela sibili. Sithi Ku Zimbabwe National Family Planning Council iyasisiza kakhulu ngokufaka ama programs lawa awamahala. Senelisile ukuthi thina esingela mali ukuthi siyehlolwa, uma ikhona inkinga sihle siqale ukwelatshwa kusase masinyane, siyakubongela lokhu.”
Isihloko salonyaka sokunanza inyanga yeBreast Cancer Month sithi "Buddy up to beat breast cancer."
Kusenjalo, ikhansili yakoBulawayo namuhla yamukele amagabha okulahlela izibi (amabhimu). UNkosikazi Sibusiso Tshuma, obekhulumela iClean Box, uthi inkampani yabo igxile kakhulu ngezokuhlanzeka ngakho-ke bakubone kufanele ukuthi bancedisane IeCity Council.
"I Clean Box iphathisa kakhulu empahleni zokucleaner emawofisini njalo lasezindlini siyenza futhi lokwama disinfection lama fumigation services njalo senza ama detergents angaphansi kwe A+ lapho esiyenza khona ama sanitizer lawo wonke ama detergent angabe esebenza ezindlini.Njalo iClean Box iyingxenye yenkampani ye LC Biotac,sibone kumqoka ukuthi siphathisane le Bulawayo City Council ukuze sincedisane ukuthi sigcine iBulawayo yethu ihlanzekile."
UMnu. Mlandu Ncube, ongumsekeli kaSodolobho, uthi abantu kumele bancedisane lekhansili ukwenzela ukuthi bagcine idolobho lihlanzekile.
"Sithanda ukubonga abe Clean Box Zimbabwe ngokusipha amabin okuthi sifakele izibi njalo siyathemba izakhamuzi ziwasebenzisa ngendlela ephakemeyo sikhuthaza abenza imisebenzi njengabe Clean Box ukuthi basincedise njengedolobho.
Inhlanganiso ye Clean box isebenza ngozokuhlanzeka njalo isenza imithi yokuhlanza ezindlini kanye lamawofini.
