Abantu bakoBulawayo babuthene ngoLwesibili benanza iminyaka eyedlula elikhulu -125 - idolobho leli lathola isicoco sokuba lidolobho elikhulu kwele Zimbabwe.
Kulabenhlangothi ezitshiyeneyo abaze embuthanweni lo kodwa ezinye izakhamizi zakoBulawayo ziveze ukungabi lolwazi ngokuthakazelelwa kwalolusuku.
Omunye wabananze usuku lolu nguMnu. Phineus Ndlovu, imgcinisihlalo wabantu abadala bakoBulawayo, othi luqakathekile usuku lolu.
“Sikhangele umcimbi lo okhona phakathi kwedolobho lakoBulawayo. Njengabantu bakoBulawayo, lokhu kuveza ukuphumelela. Kumele sikunanzelele thina njengabantu bakoBulawayo ukuthi uBulawayo wenelise iminyaka eyi 125 ephiwe isicoco sokuba yisigodlo, ukuba lidolobho lesibili elizweni leZimbabwe. Abantu bakoBulawayo bayakuqakathekisa lokhu, bazizwa bekhudumala, kuyinto enhle eyenzakala koBulawayo.”
UNosizo Ndebele, omunye wabasakhulayo ofunda koBulawayo, uthi bathakazele uBulawayo njalo bakhangelele ukumlondoloza.
“Thina singabantwana bakoBulawayo silapha ukuzothakazelela isigodlo samakhosi, uBulawayo omuhle oze wakhula wafikisa iminyaka eyi 125. Thina esikukhangeleyo siyizakhamizi zakoBulawayo yikuthi silondoloze uBulawayo indawo yethu enhle yenelise eminye iminyaka njalo.”
Kodwa-ke, uNkosazana Christine Moyo, uthi ubengazi lutho ngosuku lolu.
“Ngizalelwe khonapha koBulawayo. Ngithole lapha eCity Hall kuphithizela, bengingazi ukuthi kwenzakalani kodwa ngithi ma ngibuza ngizwa kuthiwa kunanzwa iminyaka yedolobho leli engu125. Besicela ukuthi lisitshele kusese masinyane ukuze sazi ukucelebrater sibanengi leli ilanga.”
Inengi labantu bakoBulawayo lize ngobunengi emkhosini wokuthakazelela iminyaka edlula elikhulu-125 lapho lelo dolobho lathola isicoco sokuba lidolobho elikhulu lisiba ngelesibili elikhulu lilandela eleHarare.
Bekuhlangene abantwana besikolo, osomabhizimusi, okhansela bedolobho, abahlabeleli, abafundisi labezinye inhlangothi zempilo ukuzothakazelela lolu suku.
Uzulu wakoBulawayo ukhunjuzwe ukuba athuthukise leli dolobho libe nguMasiyemphambili. Inengi likhanye lijabulela usuku lolu loba nje abasakhulayo bekhanye bengazi okunengi ngembali yalel’idolobho.
