Ikhansili yedolobho lakoBulawayo yazise ukuba isizaqala njalo uhlelo lokuhambisa amanzi athwala ingcekeza ngesikhathi esifanayo ukuze impompi ezithwala lawo manzi ikakhulu aphuma ezambuzini zingadabuki zicine zibangela ukuqhamuka kwemikhuhlane.
Lumbiko uvezwe ngumanjinela wedolobho lakoBulawayo, uManjinela Mercy Ncube emhlanganweni ohlanganise abekhansili yaleli dolobho lezakhamizi, wokubonisana ngodubo lwamanzi.
UManjinela Ncube uthi ngenyanga edluleyo kube lezehlakalo ezingaba yinkulungwane lamakhulu amahlanu-1,500 zokudubuka kwempompi ezithwala amanzi angcolileyo ikakhulu aphuma ezambuzini.
UKhansila Mlandu Ncube obemele uMayor wedolobho kulo umhlangano, ukhuthaze uzulu ukuba alondoloze amanzi njalo aqhubekele phambili ngokuhlanzeka.
''Loluludubo lubuhlungu sibili ukuba uBulawayo kalamanzi njalo kungenxa yendaba ezithile, ukwehluleka kukahulumende ukuqedisa uhlelo lweGwayi-Shangani, leZambezi pipe, umumo womkhathi kanye lokuhamba kwandla kagesti yikho sisenza imihlangano le ukuze siphume lenhlelo zokulondoloza amanzi lamasu ukuthi sithole amanzi edolobheni.''
UMabhalane wekhansili uNkosikazi Sikhangele Zhou uthi idolobho libhekane lodubo lokusilela kwamanzi okudala ukuba uzulu engatholi amanzi malanga onke.
''Amanzi khathesi emadamu asemalutshwane, sesivala amanzi okwensuku ezintathu ukuze amazi asifikise isikhathi sezulu. Idamu lethu leCriterion eligcina amanzi lisuka libhekane lodubo lokusilela kwamandla kagesti, iZESA iyayisibonise ukuba amandla kagesti ayasilela basicimele kube sekusehlula ukudonsa amanzi esuka emadamu okucina kubangela ukuqhubekela phambili kokusilela kwamanzi kuzakhamizi.''
UNkosikazi Zhou uchaze ukuba idolobho selisalelwe lamanzi angaba yisilinganiso samatshumi amane ekhulwini.
''Khathesi amadamu ethu aku37 percent, amanzi amanengi ase Insiza, uUpper Ncema kudala woma, Umzingwane kusele incosana engavuka laye ewomile. Sekusehlula ukuletha amanzi enelayo kuzakhamizi ngoba zonke impompi ezidonsa amanzi zisuka emadamu wonke lawa, kungaswelakala amandla kagesti kubanzima ukutholisa uzulu amanzi malanga onke.''
Okwamanje kulandela ukusilela kwamanzi edolobheni ikhansili isivalela uzulu amanzi okwamalanga amathathu kumbe adlulayo kusiya ngokuthi kulamandla kagesti adonsa amanzi esuka emadamu kumbe hatshi.
Abohlangothi olubona ngokuphathisa nxa kuthe kwaqhamuka ingozi yomlilo, kumanisipala wakoBulawayo sebesehluleka ukuphathisa ngezikhathi zengozi yomlilo ngoba amatanka athwala amanzi lawo ayasilela.
