Abanengi asebathatha umhlalaphansi bathi lanxa bethakazelela umthetho omutsha osalungiswa owokuthi isikhwama sama pentsheni sizimele sodwa, izisebenzi zikahulumende zithi zikhathazekile ngemali ephansi eziyiphiwayo, njalo umthetho-lo awukuhlolisisi lokhu.
Abakade bebuthene koBulawayo emhlanganweni obuqhutshwa yikhomithi yephalamende ebona ngezisebenzi zika hulumende ngoLwesithathu bathe imali yomhlalaphansi abayitholayo ibangela ukuthi beqhubeke behlupheka ngakho bafisa lumthetho ozasungulwa ubelakho ukuthi iholo lihlale lihlolisiswa njalo likhutshulwa uma kulesidingo.
UNkosikazi Anne Mudamburi Dube, owaye sebenza ku gatsha lwezempilakahle uthi nxa ungelaye okuncedisayo uyabe usenkingeni enkulu kakhulu.
“Imali esiyiphiwayo ayenelisi kumele ngibhadale irent, icity council, mele ngthenge iZesa, mele ngiyebona udokotela, mele ngthenge amapilisi mele ngidle kumele li reviewe now and again siyakucela khonokhwana ngoba trully speaking imali esiyihola khathesi its painful.”
Abanengi bathi bathola imali engaphansi kwekhulu lamadola eMelika engeneli ukuthi bakhokhele indleko zabo kumanisipala kanye lokuthenga ukudla.
UNkosikazi Priscilla Mpofu oweLuveve uthi ubona umthetho lo osalungiswa umuhle uma imali yezisebenzi ingasoze intshontshwe.
“Iluhlelo oluhle kakhulu provided singabi yiZimbabwe le esiyiyo ukuthi ziyathi imali zethu sezivumile khonangapho phezulu zibe zicutshwa cutshwa kusenziwa okunye ngazo thina kubuye kungasincedi lutho."
Owaye sebenza kugatsha lwezemfundo, uMnumzana Webster Sibanda ukhale ngokuguquka komthetho owawulawula ukuthi osetshiye umsebenzi uhola okungama tshumi ayisithupha lasithupha ekhulwini 66 percent kumholo otholwa ngulowo owenza umsebenzi ayekuwo engakaphumi.
Uthi ukuhlanganisa abantu bahole okufanayo akulunganga.
“Ipayment at that time was twothirds of what those in your previous grade were getting but what happened ngo 2012 ba reversa konke and abantu baba bhantsha bonke and we are all on one pension which is very unfair.”
Abantu abanengi basukume baphuma umhlangano uqalisa besizwa ukuthi umthetho lo uqondane lezisebenzi zikahulumende kuphela.
Omunye wabo nguMnumzana Misheck Ngulube, owayesebenza koLoliwe, othi badane kakhulu ngokuthi sebecezwa ngoba indubo abakhangelane lazo ziyafana lalezo ezabasebenzela uhulumende.
“Thina silama problems amanengi kakhulu le pentsheni esiyi holayo its less than 200 after working for companies for more than 30 years umdlwane wemali, so lapha besicabanga ukuthi sizabuya lapha sikhulume ukuthi bengeze imali iNSSA siphiwa $60”
Abanye bathi uhulumende kumele enze lokho okwenziwa ngamanye amazwe aholise wonke umuntu osedlulise imali yokuthatha umhlalaphansi.
Omunye wabo nguMnumzana Christopher Mpilo.
“Kumele ba benchmake ngalokho okwenzakala eBotswana, ngalokhu okwenzakala eSouth Africa lapho okuthi wonke umuntu ole 60 uyahola lapha kwehlulani kanti, thina sise Southern Africa why sisiba different kulamanye amazwe singenzi into ezisuthisa izizalwane zalelo lizwe.”
Ilunga lephalemnde ele Emakhandeni Luveve, UMnumzana Descent Bajila oyingxenye ye khomithi ethapha imbono yabantu kuloluhlelo; eye Parliamentary Committee on Public Service, Labour and Social Welfare, uthi lapho asebehambe khona okugoqela ePlumtree, Lupane kanye le Bulawayo, abanengi behluleke ukwehlukanisa phakathi kwalabo abasebenzela uhulumende lamankampani azimele wodwa.
“Okunengi abantu abakutshoyo yikuthi umthetho lowu awudale ukuthi izimali zabo nxa bethe bayazithathelwa ngeskhathi besasebenza zingabi zimali ezizabahlukumeza sebeqedile emsebenzini sezidliwa ngabanye abantu sezidliwa layi inflation.”
Umphathintambo wogatsha olubona ngezisebenzi zikahulumende uMnumzana Edgar Moyo uthI bakhangelele ukukhulisa isikhwama sama pension ngomthetho lo.
"Overall objective yikuthi sibe lama pentshini amahle ebantwini sikhulise iskhwama sama penstheni kube lendlela entsha yokusebenzisa amapentsheni ezenza ukuthi izisebenzi nxa sezithethe umhlala phansi zithole okungcono.”
Umthetho lo uzasungula iState Pensions Fund lapho okuzafakwa khona imali zezisebenzi njalo iyabe ikhangelwe yiboard ezakhethwa ngumphathintambo wogatsha oluyabe lungaphansi kwayo.
Abanengi kulumhlangano bakhale ngemali abayiphiwa yiNSSA besithi incane kakhulu kodwa obephethe umhlangano, uMnumzana Bajila uthe umthetho -lo awuqondananga leNSSA ngakho ngeke kukhulunywe ngayo.
Forum