Abazali abalabantwana abafunda behlala esikolo bakhala ngokuvulwa kwezikolo sekusele iviki ukuthi ikhefu lePhasika lifike bethi lokhu kubengezelela indleko.
IPhasika ikhangelelwe ukuqala mhlaka 2 Mabasa lapho abafundi bazabe sebeleviki bevulile izikolo. Lokhu akubaphathi kuhle abazali abalabantwana abafunda behlala ezikolo, kuma boarding schools.
UNkosikazi Getrude Nyoni umzali olomtwana ofunda ehlala esikolo ngomunye okhalaza ngenyathela leli.
“Kanti bathi izikolo zivulwe njani thina sisisya ku holiday bazavula baphinde bevale. Thina esilabantwana abafunda ema boarding school sizayithatha ngaphi imali yokuphinda sibagadise futhi nxa bezabe behamba ama up and down. I-4days lezi bazabe bengaphi behlezi nje esikolo ngapha siqede imali sibenzisa ama extra lessons ukuze bafunde khathesi siyayithatha ngaphi imali yokuthi bagade futhi nxa bengavala ngemva kweviki, izikolo azivulwe after i-holiday vele.”
Omunye njalo umzali uNkosikazi Senzeni Nleya uthi ubona lokhu kungamemethekisa iCOVID-19.
“Kuyavulwa mhlaka 22 kodwa silesimanga ukuthi besanda kuvula kule holiday eye Easter. Abantwana abasema boarding school ke bona bazabe behlezi yini khonale ngapha kungafundwa ngesikhathi se holiday. Lokhu mina ngikubona kungekho right vele alubana bavula after Easter bekuzabe kungcono. Lomkhuhlane lowu esiphakathi kiwo nxa bezahamba abantwana bayehlangana ndawonye baphinde baphenduke ingozi yokumemethekisa iCOVID-19 inkulu kakhulu.”
Ekhuluma emele ababalisi abafundisa emaphandleni kunhlanganiso eye Amalgameted Rural Teachers Union of Zimbabwe umgcinisihlalo weMatabeleland North, uNkosikazi Sukoluhle Ndlovu, uthi njengababalisi ababoni kungumqondo omuhle.
“Ma sikhangele i-calendar sibona kuzaba lokuphambaniseka okuthize ngoba kuhlangana lamakhefu amanengi kuyikuqala kwe term okuzaphambanisa ukufunda. Njalo lokhu kuzenza ababalisi labantwana besikolo bahambe phansi laphezulu ngesikhathi samakhefu lawa, kucine kumemethekisa umkhuhlane we Covid-19. Thina sibona ukuba ngabe bakuhlele ukuthi izikolo zivulwe kwamakhefu lawa aphambili. Njalo angiboni ukuthi ukuvulwa kwezikolo kuzavuma ngoba ama teachers ayakhonona ukuthi iholo labo lisaphansi.”
UMnu. Taungana Ndoro, isikhulumeli sogatsha lwezemfundo, wenqabe ukuthatshwa ilizwi kodwa utshele iStudio 7 ukuthi ikhalenda yezikolo lokhe ingakapheli ukuhlelwa kakuhle kukhangelisiswa amakhefu aphakathi kwenyanga kaMabasa.
Uhulumende ubesekhiphe umbiko othi usehlele ukuba izikolo zivulwe ngezigaba ezimbili, lapho okuzaqala abafundi abaloba imihloliso lonyaka abakhangelelwe ukuvula mhlaka 15 Mabasa kuthi abanye bonke abafundi bavule mhlaka 22 Mabasa.
Uthi njalo izikolo sezilungele ukwamukela abafundi, leziqondiso zokulwisa ukumemetheka komkhuhlane weCOVID-19 zizalandelwa ngokugcweleyo.
Inengi labantu labafundi bathi izikolo kuzamele zivulwe yebo, kodwa abakusolayo yikuthi zivulwe ngale indlela engabangezelela indleko bona bevele bethwele nzima ukusebenza phansi kwesimo somnotho welizwe esingamanga kuhle kanye lohlelo lokumelana leCOVID-19 olwe Lockdown.