Ekhuluma ngesikhathi kubukiswa ibhayisikopo elonda imbali yomdlali olodumo emdlalweni wenguqu kweleZimbabwe uGeorge Shaya, owayeyisiphathamandla senhlanganiso yeZimbabwe Football Association uNdumiso Gumede uthe kuyinto enhle kakhulu ukulondoloza imisebenzi yabadlali.
“Kuqakatheke kabi ukwenza lokhu ngoba namhla nxa ngingakhuluma lawe ngomuntu okuthiwa ngu Dididi Ncube awungeke ubemazi, kodwa njengoba sesikwazi ukucindezela sisebenzisa imitshina yakulezinsuku sekumele sihle sitshaye sibambile ukuze silondoloze ubuciko balaba bantu,” kutsho uGumede.
Ukubukiswa kwebhayisikopo kaShaya, owaduma edlalela iqembu le Dynamos kanye leqembu elimela ilizwe, kuza ngemva kokuba lonyaka kulabadlali abambalwa abalodumo abadlule emhlabeni abagoqela uDavid Mandigora, uMisheck Chidzamba, uJoe Mugabe kanye loEnerst Maphepha Sibanda.
Akuvamanga kwele Zimbabwe ukuba abadlali balobe ingwalo belandisa ngempilo zabo loba nje eminyakeni eyedluleyo uMemory Mucherahowa, uJaphet M’parutsa kanye loBruce Grobbelaar bekwenzile lokho.
UGumede uthe inhlelo ezifana lalolu olokuncindezela imifanekiso eyabadlali zivala leso sikhala ngoba kukuhle kakhulu ukuba umuntu azikhulumele esaphila.
“Kumele sizame ngamandla ethu wonke ukuba sithaphe indaba kibo abadlali mathupha, kulokuba silinde baze bathi sebefile kubeyikhona sesiqala ukuzama ukukhumbula ababekwenza.
Kuba kuhle nxa sithola indaba zivela kibo, abangane babo, kanye lezimuli zabo, njengalokhu okwanzakale ngalo umfanekiso eliwubukisa lapha,” kutsho uGumede.
Uhlelo lokucindezela imbali yabadlali abalodumo elizweni luqalwe nguAlbert Chiwandamira, oyisizalwane selizwe leZimbabwe esihlala elizweni lase United States of America.
UChiwandamira usebenzisana lentatheli zindaba ezikwele Zimbabwe ezigoqela owayengumhleli wezemidlalo kuphephandaba le Chronicle uLovemore Dube.
UDube uthe ibhayisikopo kaShaya ngeyakuqala kwamanengi abazawacindezela njalo ngomnyaka ozayo bazakhupha umfanekiso olandisa ngempilo kamuyi uTymon Mabaleka, yena owaduma edlalela iqembu le Highlanders waphinda waba lodumo kwezomculo ecindezela abaculi abalodumo elizweni leZimbabwe.