Abatsha abahlala edolobheni lakoBulawayo bathi ikhefu leKhisimusi yisikhathi sokuhlangana lezihlobo labangane njalo lokufundisana ngokutshiyeneyo okunceda abantu bonke.
Bethule lokhu ngosuku lweKhisimusi besithi usuku lolu lonyaka akunjengesikhathi esedluleyo lapho ababekholisa khona.
UNkosazana Tumelo Mnklandla uthi lolu lusuku lokuhlangana lezihlobo ezivela endaweni ezitshiyeneyo.
“Ekuseni siqale saya eChurch, sasesisiya hlangana emini njengemuli lapho ebesibonisana khona ngokusihluphayo lesihlangana lakho empilweni. Lesi yisikhathi njalo sokubona injiva ezivela eGoli.”
UMnu. Nkosiyalinda Tshili uthi bazakhulumisana ngokuziphatha.
“Sifisa ukuyawosa sibesesixoxa njenga bantu abatsha sihlolisisa konke esidibana lakho. Abadala bakhona ezindlini kodwa sikubone kuqakathekile ukuthi sihlangane sodwa sikhulumisane ngokutshiyeneyo. Kunengi njalo esizakwenza labadala.”
UMakhosini Ndlovu yena uthi okuqakathekileyo yikuthi baphethe umnyaka bengabaphilayo.
“Umnyaka ka2018 ubumnandi mbijana kodwa kukhona okuncinyane okuyabe kusenzakala. Okuqakathekileyo yikuthi sesiyawuphutsha siphilile. Kumele sicabange ukuthi umnyaka ka2019 simgena njani, siyawungena sikuNkulunkulu but okuqakathekileyo yikuthi siwuqeda siphilile sijabulile. Kumele siwuphutshe kuhle silezihlobo labangane.”
UMnu. Somandla Malunga uthi kukhona okunye ayekubhale phansi akufezayo loba nje kukhona okunye angakufezanga.
“… Ngiyakwazi ukuthi kukhona okuyi engangikubhalile kodwa angikwenzanga. Kodwa umnyaka lo ngizawuqeda kuhle.”
Intsha enengi itshengisele ukuqakatheka kwemuli ngalesisikhathi njalo ithakazelela usuku lweKhisimusi. Izihlobo ezivela endaweni ezehlukeneyo lazo zihlangene njalo zichitha lelithuba ndawonye kusiyafika emnyakeni omutsha. Ukuba lenhlelo zomnyaka ozayo ngenye yezinto intsha ezikhuthazana ngayo kulungiselelwa isikhathi esizayo.
