Abantu abanengi bathakazelela ukwakhiwa kwelitshe lesikhumbuzo elakhelwe owayeyinduna enkulu uGambu Sithole wakuqala. Bathi kuqakathekile ukuba kukhunjulwe abasungula isizwe saMaNdebele.
Bekugcwele abantu esigabeni sakoGambu eMangwe ngoLwesihlanu okuvulwe okusemthethweni ilitshe lika Gampu wakuqala, oloyisemkhulu uMagogo Sithole owalwa izimpi evikela iNkosi uMzilikazi owamcedisa njalo ekusunguleni isizwe sikaMthwakazi. Wasala enkundleni okwakubambane impi yaKwaZulu leyenkanyamba, kwathi esikhundleni sakhe kwathatha indodana yakhe uMaqhekeni Sithole. Abezomdabu bathi ukwakhelwa kweliba lenduna le kuveza ukuba wadlala indima enkulu ekubunjweni kwesizwe saMaNdebele. Ilitshe leli livulwe yinduna uAshel Gampu IV. Isethula inkulumo yayo ngemuva kokwembula lesi sikhumbuzo, induna ikhuthaze abantu ukuba beziqhenye ngobuntu babo.
"Mahlabezulu, lingesabi ubuntu benu, lingesabi ubuyini benu njalo kungabi longafuni ukuthi libeyilokho eliyikho khona. Ezombusazwe lazo zingaphambanisi ubukhokheli bomdabu ngoba kuyaxabanisa."
Induna esanda kubekwa, uMorning Manguba Moyo, utshele abasembuthanweni lo ukuba kumele abantu bedonse kanyekanye ukuze bethuthuke ngemfanelo.
"Asibambane ngokomoya bantu bakithi ngoba sikhumbula induna yethu njalo singabambana kuzadala ukuthi uNduna uGampu 1 labanye basikhokhele siphathe kuhle abantu."
Bakulenkokheli zomdabu ezinengi emkhosini lo ezigoqela induna uFuyana, uMathema, uDakamela, uMafala labanye abakhuthaze uzulu ukuba ananze amasiko ngokupheleleyo. Induna uMbusi Bekithemba Dakamela Ncube weBabambeni eNkayi uthe kumele inkokheli zomdabu ziphathe kahle uzulu.
“Lamuhla sifunde ukuthi siphathe kuhle isizwe ngoba okhokho bethu abayibo abadabula ubukhosi esesibuthatha kibo baphatha kuhle isizwe yikho lathi kumele sithathe kibo asizifakanga kodwa okhokho bethu yibo abakudabulayo ngobuqhawe babo."
Abezombusazwe labo bebekhona emkhosini lo. Umkhokheli webandla leZAPU, uMnu. Sibangilizwe Nkomo, uthe kuqakathekile ukudlelana kuhle labantu.
"Sifunde isiko lethu kabanzi, indlela abendulo ababephatha ngayo uzulu njalo mina ngiyalithakazelela isiko lakithi. Ngilusuzi ngokuzwa abantu bekhala ngobukhokheli obukhona bezombangazwe obungaphathi kuhle abantu."
Ubekhona njalo lomele iMangwe edale lephalamende, uMnu. Dingumuzi Phuthi, yena okhuthaze abantu ukuba belobe imbali yesizwe sikaMthwakazi njengalokhu okwakusenziwa ngabamhlophe.
"Ungakhangela abamhlophe baloba imbali yabo.kuzozonke indawo lapho abadlula khona benqotshwa libutho elalikhokhelwa nguChief Gampu 1, kodwa thina asilayo leyombali kahle,kuhle ngoba sesilembali yethu lapha ezanceda abalobi labacubunguli.
UMnu. Mbuso Ngwenya laye ongaphansi kobuduna benduna uGampu njalo olokubamba iqhaza kuzinhlelo zomsakazo weStudio 7, ikakhululu ezamasiko laye ufike evunule, wagcizelela ekutheni isibili induna uGampu yayingumuntu omkhulu njengoba yayiphethe igabha lokuyixhiba elaliphethe amabutho amanengi ngaphansi kwalo.
" Nxa kungaqhubeka esizweni sonke sivuselela njalonsihlonipha usiko lethu isizwe singavuka"
Kukanti lomdeni wakoGampu Sithole uthakazelele ukwakhiwa kwelitshe lesikhumbuzo likakhokho wawo. UNkosikazi Sheila Sithole isizukulwane senduna uGampu Sithole 1 uthakazelele okwenziwe lapho okulele khona induna le.
"Ilitshe leli liyisibonelo sokuqakatheka kwembali yethu njalo uChief Gampu 1 wadlala indima enkulu ngalesosikhathi kuhle sesiyilondile."
Ngomnyaka ka1893, induna uGampu Sithole 1 owayekhokhela amabutho eNkosi uLobhengula wathunywa yiNkosi ukuyolwisana lebutho leBritish South African Company kanye leBechuanaland Boarder Police wanqoba.
Forum