Noma nje eleBotswana lisithi kusukela ekuqaleni kweviki ezayo selivumela izimota ezithwala uzulu ukuchapha imngcele, sokulokwesabela ukuba kulengozi yokuthi inengi labeZimbabwe lingehluleka ukuya ekhaya ngesikhathi sekhefu yeKhisimusi.
Umsekeli kamgcinisihlalo wekhomithi ebona ngokulwisana lomkhuhlane weCOVID-19 kweleBotswana, usikwicamfundo Mosepele Mosepele, uthi abantu kumele bahlale phansi ngesikhathi sekhefu, bengahamba hambi.
Esethula umbiko wakhe oqakathekileyo ngesimo seCOVID-19 kweleBotswana, uMosepele uthi abantu kumele bafunde ukuphila kutsha ngaphansi komkhuhlane wecoronavirus.
Ngokunjalo ukhuthaza abantu ukuba bengaphumi ezindaweni abakuzo ngesikhathi sekhefu leKhisimusi, kuyindlela yokwenqabela ukumemetheka komkhuhlane lo...
"Kungenzeka ukuthi sisiyafika kuKhisimusi kunzima. Thumela imali ekhaya ungahambi, libatshele ukuthi lapha esikhona kunzima ngenxa yokumemetheka komkhuhlane weCOVID-19."
Umbiko wokuthi abantu balakho ukuvalelwa ezabelweni zabo bengahambeli khatshana, zindaba ezinzima ikakhulu kwabeZimbabwe, abasebelesikhathi eside bengavakatsheli ekhaya.
Umnunzana Packers Ndlovu ohlala eGaborone uthi kungabanzima kubo uma bengehluleka ukuya ekhaya…
“Ludaba oluhlukuluzayo, ludaba olubuhlungu. Ungakhangela imngcele ibe ivaliwe umnyaka wonke, kungahanjwa. Asizange sithole ithuba lokuthi siyebona abadala bethu ekhaya. Lokubathumela imphahla bekunzima.”
UNdlovu ukhala ngokuthi noma nje inani labantu abalomkhuhlane weCOVID-19 liqonga kweleBotswana, bekungakabi kubi kangako okokuthi abantu bangaqatshelwa ukuchapha imngcele.
Sekubhubhe abangamatshumi amathathu kweleBotswana ngenxa yomkhuhlane weCOVID-19.
Uhulumende weBotswana ukhala ngokuthi ukubuthana kwabantu ikakhulu endaweni zokuzikholisisa, yikho okudala ukumemetheka komkhuhlane.
Umnunzana Collen Mlalazi, isizalwane seZimbabwe eGaborone, uthi kungaze kuvulwe ukuthi abantu bechaphe umngcele, kuzaba nzima, ikakhulu kundleko zokuhamba…
“Khona kodwa vele kuzabanzima ngoba kulemigoqo ekuhambeni. Ukuhlolwa iCOVID-19 ukuze uhambe kumele uhlawule imali engange P1,000, besekusithi ufika ekhaya bathi $60, phezu kwezinye imali ozazichitha kuhambo.” NgeSonto, eleBotswana libike ukuthi sekuzasungulwa ukuhamba kwamabhasi athwala uzulu phakathi kweleBotswana leZimbabwe, kanye leSouth Africa leZambia.
Kodwa ukuthokoza kwenengi kuyekwafiphala ngesikhathi ikhomithi eyeCOVID-19 isethula umbiko, ikhuza isithi abantu bezifundise ukuhlala ezindlini ngesikhathi sekhefu.