Uzulu weZimbabwe ulembono eyehlukeneyo ngohulumende okhona ngemva kokususwa kowayengumongameli uMnu. Robert Mugabe, abanye besithi umbuso kaMugabe wawungcono kulokubuswa ngamasotsha.
Lokhu bakutsho kungakedluli amaviki amathathu ngemva kokususwa kwakhe.
Omunye wabaxoxe ngodaba lolu lomsakazo weVOA Studio 7 nguMnu. Qobo Mayisa othe kamkhanuki uMugabe ngoba umkhumbula ngokubhidliza isizwe kanye lezikolo, izibhedlela lamakhampani ngenxa yombangazwe.
Uthe abukho ubuhle abenzayo ngesikhathi eqala ukubusa ngo1980 kuze kuyefika lamuhla. Uthe ilizwe selibhidlizwe yikuhlala kwakhe isikhathi eside embusweni.
Ohlaziya ngezomnotho, uMnu. Butler Tambo, uthe uMugabe wayeqale kahle ngokwakha izikolo lezibhedlela.
Kodwa inengi labantu licine selingasatholi imisebenzi ngenxa yemithetho ayivumela ukuthi ifakwe eyabulala ezomnotho.
Osakhulayo, uMnu. David Ndlovu, uthe uMugabe ukhangeleka emubi ngenxa yezenzo ezimbi njalo bafisa ukuthi bazwe uMugabe ekhuluma ukuthi kuyini okwenzakalayo aze asuswe embusweni.
Uthe uMongameli Emmerson Mnangagwa kacitshi amanyathelo kaMugabe kodwa uzama ukuqondisa amaphutha enziwa nguMugabe.
Omunye njalo osakhulayo, uMnu. Sanele Ntubeni, uthe uyamkhumbula uMugabe ngenxa yokukhalipha kanye lobuntu bakhe.
Ngesikhathi ibutho lihluthula umbuso uzulu wajabula kakhulu ukuthi uMugabe setshiya isihlalo sobukhosi kodwa khathesi sokuqala ukuba sobala ukuthi ibutho lahluthuna umbuso lanxa likulandula lokhu.
Ngokunjalo, izehlakalo esezenzakele kulandela lokhu azisamjabulisi uzulu. Amabutho ambalwa asephiwe izikhundla kuhulumende kuthi inkamba zamasotsha sezitshintshwe amabizo zaphiwa ababantu abalwa impi yankululeko.
