Kubotshwe abalwela amalungelo oluntu abane eHarare ngoLwesithathu ngemva kokugada indizamtshina besiya emhlanganweni eVictoria Falls.
Inhlanganiso yamagqwetha, iZimbabwe Lawyers for Human Rights ithi abantu laba, ababalisa uNkosazana Namatai Kwekweza, uMnu Robson Chere owenhlanganiso yababalisi bemaphandleni eyeAmalgamated Rural Teachers of Zimbabwe, ukhansila kaWard 5 eHarare uSamuel Gwezi loVusumuzi Moyo, bathethwe endizamtshineni yeFastjet njalo akwaziwa ukuthi bangaphi lokuthi betheswa cala bani.
Isikhulumeli samapholisa uMnu Paul Nyathi utshele iStudio 7 ukuthi ubengakezwa lutho ngaloludaba.
Ukubotshwa kwabane laba kuza ngesikhathi uhulumende ebopha abamabandla aphikisayo labasola umbuso weZanu PF, ngoba esithi baqoqa ukutshengisela ngodlakela ngesikhathi somhlangano weSadc ozaqhutshelwa eHarare ngenyanga ezayo.
Amalunga eCCC angamatshumi phose ayisitshiyangaolmbili agoqela uMnu Jameson Timba asedlulise inyanga evalelwe ngemva kokubotshwa ngesizatho esifanayo.
Kodwa ayalilandula lelicala.
Umkhokheli wenhlanganiso elwela amalungelo oluntu eyeIbhetshu likaZulu uMnu Mbuso Fuzwayo utshwele iStudio 7 ukuthi ukubotshwa kwabantu laba kuveza sobala ukuthi uhulumende uya phambili ngokwephula amalungelo oluntu.
Forum