Abasemhlanganweni ophathalane lomsebenzi wokwemba oqhutshelwa koBulawayo bakhala ngamankampani akwamanye amazwe emba okutshiyeneyo ngendlela ezingaqedakaliyo kwele Zimbabwe.
Bathi kumele uhulumende angenele ngoba amankampani la ahlukumeza izisebenzi.
Inengi labangene umhlangano oweMining Indaba, bathi amankampani amanengi ephula amalungelo ezisebenzi ngendlela ezinengi.
Omela izisebenzi ezembayo ngaphansi kweZimbabwe Diamond and Allied Mining Workers Union, uMnu lsaiah Marambire, uthi iholo eliholwa ngabembi liphansi kulelisemthethweni.
"Abembi abanengi ezweni bahola imali engaphansi kwe$350 USD eyiyo okumele beyihole kusukela kohola encane njalo lokhu kuludubo olukhulu ngoba labephula umthetho abahloniphi izinqumo zamadale ezomthethwandaba uma bengafumanwa belecala lokungaholisi kuhle izisebenzi."
UMnu Philimon Mukeula olenkampani yokwemba igolide leLithium eGwanda leMberengwa, ukhala ngokuhlukuluzwa kwabesifazana emigodini.
"Ngaphandle kokuhola imali engahambelani lesemthethweni abesifazana babanjwa ngamandla ukuya emacansini baphinde bathelelwe imikhuhlane njalo lokhu kukhona indawo ezinegi ezweni leBikita bakhala ngakho."
UMnu. Malven Daka isakhamuzi saseHwange usola ukusetshenziswa kwabantwana emigodini eminengi.
"Ngesikhathi kuqala iCovid abantwana babengasayi esikolo kodwa eHwange akhona amankampani aqhatsha abafundi abacina bengaqedanga izifundo zabo okwamanje sebebaxitsha umsebenzi uma sebephenduka emsebenzini impilo isibanzimela."
Ilunga ledale lephalamende elikukhomidi yezemigodi uNkosikazi Jassmine Toffa uvumelana labanengi ukuthi amankampani abokuza eza lenhlupho.
"Idale liphakathi kokukhangela zonke izikhalazo ezivela kwezemigodi njalo siphakathi kokuphuma ijumo ezweni sisiyakuzulu ukuze siphume lemithetho ezalawula ukusebenza kuhle kwezemigodi ezweni ngoba okwamanje amankampani okuza azenzela umathanda abahloniphi lamalungelo omhlaba lezisebenzi kusemahlangeni."
Isikhulumi seZimbabwe Environmental Law Association uNkosazana Clarity Sibanda uthi uqakatheke kakhulu umhlangano weMining Indaba.
Inhlanganiso ezilwela amalungelo wabakumsebenzini wezemigodi ezigoqela iZimbabwe Environmental Law Association, Centre for Natural Resources Governance i European Climate Foundation leFreidrich EbertbStiftung abaqoqe lumhlangano bathi bacabange ukuwuqhuba ukuze kuphunywe lamacebo okumelana lenhlupho ezikhona emsebenzini lo. Bathi njalo kusobala ukuthi inhlupho lezi ezinye zazo sezibangwa ngamandla yikuguquka komkhathi.
Umhlangano wezokwemba walonyaka ungenwe ngabembi, abanini bemigodi izakhamizi abafundisi, amakhansila kanye lamalunga edale lephalamende.
Isihloko somhlangano lo sithi: "A just energy transition solutions for community potential and participation.” Umhlangano lo ugqitshwa ngoLwesine.
Forum