Abaphila ngokuthengisa izithelo lembida ehlukeneyo bakoBulawayo, baveza ukukhathazeka ngesinqumo esesithethwe nguhulumende sokubasusa ukuthengisela enzikini yedolobho ukuze bayethengisela endaweni ezakhethwa yikhansili isebenzelana lohulumende.
Abathengisela izilimo ezehlukeneyo edolobheni lakoBulawayo ku5th Avenue Market balaywe ukuba basuse yonke impahla yabo edolobheni bayosebenzela duzane lalapho abahlala khona osokukhube abantu abaphila ngokuthengisa.
UNkosikazi Debra Mukasa wenhlanganiso yeBulawayo Vendors Traders Association uthi linyathelo elibuhlungu leli.
''Indaba yokuthi sisuke ukuthengisela edolobheni kuyasizwisa ubuhlungu loba bethi bafuna ukuhlanza uBulawayo wabo, uma sikhangela abantu abathengisayo kunzima asazi ukuthi bayakuyangaphi. Kunengi osekudingakala ukuze umuntu abelemvumo yokuthengisa kuzakwenza ukuba kubenzima kulabo abaqala ukuthengisa kudala.''
UNkosikazi Mukasa uqhubeke ethi okdanisayo yikuba umanisiphala lohulumende kabazange bathanda ukuzwa ukuthi bona bathini ngalokhu.
''Uhulumende kazange asibuze thina njengabantu abathengisayo uvuke eseyenze isinqumo sakhe. Siyazi ukuthi kulomkhuhlne weCorona kodwa yikho lapho ebesithola khona imali yokuphila lalapho abathi siyethengisela khona akukalungiswa.''
Isakhamuzi sakoBulwayo uMnu Nkosikhona Dibiti uthi isinqumo sikahulumende lekhansili sizanceda kodwa abaphila ngokuthengisa bazalahlekelwa ngabathengi.
''Uhlelo lolu luhle ngoba luzaletha amabhizimusi duze labathengisayo labathengayo kodwa uhulumende lekhansili kumele akhulumisane labathengisayo ukuze bai ukuba kuzasetshenzwa njani ukuze amabhizimusi abo engaphambaniseki ngoba okwamanje abathengisayo basebunyameni abazilutho ngenyathela likahulumende''
UKhansila kaWard 1, uMnu. Mlandu Ncube uthi njengekhansili benzela ukwenqabela ukumemetheka komkhuhlane weCOVID-19 ngoba bengazi ukuba uphela nini.
''Indaba yabantu abathengisayo kuliqiniso ukuthi imisebenzi ayikho kodwa sizama ukuthi bengabilendleko zokugada abayethengisela duze lemakhaya abo duze labathengi njalo siphakathi kweCorona senqabela ukuthi abantu bangaminyani futhi sibalungisele indawo ngezigaba ngezigaba ngoba asazi ukuthi uhlupho lolu luyaphela nini.''
Umqondisi wenhlanganiso wabakulumsebenzi eyeBulawayo Vendors Traders Association, uMnu Michael Ndiweni uthi kuzaphazamisa ibhizimusi yabo.
''Uhlelo lokususwa kwabantu abathengisayo edolobheni siqale sikuzwa njengehungahunga kodwa sicine silanda iziphathamandla zekhansili kodwa kuzaphazamisa amabhizimusi abantu abanengi ngoba bebesebejwayele ukthengisela kuleyondawo belabantu abathenga kibo kuzaphazamisa inzuzo yabo.''
Uhulumende uthethe isinqumo sokuba abaphila ngokuthengisa laba, kumele basuke ekusebenzeleni enzikini yedolobho. Abekhansili yakoBulawayo labo bahle balaya abaphila ngokuthengisa ukuba bathathe impahla yabo yonke okwensuku ezimbili, lamhlanje lakusasa, kungedlula lapho ikhansil izathatha lezomphahla njengezibi.
Ikhansili isikhethile indawo emalokitshini lapho abantu abazathenga bethengisela khona njalo zonke indawo ebezithengisela abantu izilimo ezehlukeneyo sezizavalwa lalapho umkhuhlane weCOVID-19 ungedlula. Abathengi labathengisayo basazoyaziswa ngendawo lapho osekumele bathenge bethengisele khona.