Inhlanganiso emela abaphila lobugoga bokungezwa endlebeni ithi abantwana abanje abafika isilinganiso sokungamatshumi ayisitshiyagalolunye lane-84%, kabayi esikolo ngoba kungela babalisi abafundele umsebenzi wokufundisa.
Ekhuluma edale lephalamende umkhokheli wenhlanganiso yabaphila lalobu bugoga eye Deaf Zimbabwe Trust uNkosikazi Barbra Nyangari, ucele uhulumende ukuthi athathe amanyathelo kulungisiswe loludaba.
Isiphathamandla kugatsha lwezemfundo uMnu Peter Muzavazi uthembise ukuthi bazadinga imali kufundiswe ababalisi i-sign language ukuze benelise ukufundisa abantwana laba.
EZimbabwe kulabantwana abazinkulungwane phose ezilikhulu- 85,965 abaphila lobugoga bokungezwa endlebeni, kubike uMuzavazi.
Ilunga ledale lephalamende uNkosikazi Thabitha Khumalo utshele lumsakazo ukuthi kumele uhulumende alungisise loludaba ngokuphangisa, esithi lilungelo lakhe wonke umntwana ukuthola imfundo.
Kunjalo nje, uhulumende senxuse abalwa impi yenkululeko ukuthi bazebhalisa kakutsha.
Idale lephalamende liphethe loludaba ngoLwesithathu lapho amalunga abuze umsekeli wogatsha olubona ngabalwa impi yenkululeko uMnu Tshinga Dube ukuthi njengoba ememezela emisakwazweni kahulumende kuphela engafinyelelwa ngabanye endaweni ezikude, bazakuzwa njani abakulezo ndawo. UTshinga uphendule wathi izafika kulezo ndawo imbiko yakhe.
Kodwa ilunga ledale leli uNkosazana Thabitha Khumalo ucebise uTshinga ukuthi amemezele lakweminye imisakazo enjenge Studio 7 umsakazo wabantu olalelwa nguzulu, kodwa ukwalile lokhu uTshinga.