Intengo yempahla edolobheni lakoBulawayo iqansa nsuku zonke kulandela umthetho owethulwe nguhulumende oweStatutory Instrument 142 owalisa ukusetshenziswa kwemali yakwamanye amazwe elizweni kusukela NgoMvulo kuyonale iviki okulinyathelo elisolwa ngabanengi.
NgoMvulo uHulumende uvuke ethula umthetho owenqabela uzulu ukusetshenziswa kwemali yakwamanye amazwe ukuthenga loba ukuthengisa. Lokhu sekubangele ukuba abamavinkili amakhulu lamancane bakhuphule intengo yempahla.
Isakhamuzi sakoBulawayo uNkosikazi Fortune Moyo uthi uHulumende wenze iphutha.
"Ukuqansa kwentengo ezitolo asikuzwisis kakuhle ukuthi uhulumende efake umthetho wokuthenaga lokuthengisa ngebond note bekulungile kodwa bekumele beqale befake umthetho wokuthi abanini bamavinkili bengakhwezi intengo ukuze loba sebefaka umthetho abantu bayenelise ukuthenga.''
Esinye isakhamuzi sakoBulawayo, uMnu Mandla Tshuma uthi okubuhlungu yikuthi iholo labantu alikhuphukanga.
“Ukuqansa kwentengo emavinkilini kuyinto ebuhlungu kakhulu ngoba iholo labantu alikhwezwanga lohulumende laye lokhe ethembisa ukukhwezela izisebenzi iholo,imali yakwamanye amazwe ivaliwe abantu bazaphila nzima, izinto zizakubakhona kodwa ziswele abantu abathengayo.''
Esinye njalo isakhamuzi sako Bulawayo, uMnu Thomas Sithole uthi ukuqansa kwentengo lokhu akubaphathi kahle.
“Lokhu sekusithwalise nzima kakhulu besisithi uhulumende uyalungisa izinto njengoba esethe imali zakwamanye amazwe zingasebenzi esesikubona kusenzakala kuntengo yezinto empahleni akusiphathi kahle sinanzelela ukuthi labo abakade bethengisa ngemali yaphandle sebeyiguqule inteno yabayibond,uma impahla ibiyiUSD10 isiyi 100 Bond. "
OSiphatheleni labo sebeqila abantu bethatha imali yakwamanye amazwe ngemali ephansi, kutsho uSithole.
“Silokhe sisakukhangele ukuthi kuhamba njani kodwa sinanzelela ukuthi laba abantshintsha imali emkambo wangasese sebefuna ukuqila abantu ikakhulu bekhangele ukuthi abantu bebengela lwazi olusuka kuhulumende ngoba into le ijume wonke umuntu sebefuna ukuthatha imali yakwamanye amazwe ngentengo ephansi, uma usufuna ukuthenga imali kibo bakuthenisela ngemali aphezulu, sekulobuqili bebamba abantu ngesimo esinzima esikhona manje."
Imali yohlobo lweBond Note iyalingana lemali yebulenjini iRTGS njalo kusukela NgoMvulo akulamuntu olelungelo lokusebenzisa imali yakwamanye amazwe ethenga kumbe ethengisa eZimbabwe kodwa lokhu sekubangele ukuqansa kwentengo yezinto okudlulise amalawulo.
KoBulawayo osomabhizimusi bakhweze intengo yempahla osekutshiye uzulu ekhathazekile.
Kusenjalo, kulandela ukwethulwa komthetho wokunqabela ukusebenza kwemali yakwamanye amazwe, uhulumende usekhuphe abantu abahamba behlola intengo zempahla kungela nyathela asebethe balithatha kumavinkili asekhweze intengo.
