Abatshayeli bezimota ezithwala abantu phansi kwenkampani yeBolt kweleSouth Africa okugoqela labeZimbabwe bakhala ngokungavikelwa yinkampani le kulandela ukubulawa komunye wabo ngabantu abamdubula bambulala bezenza abafuna ukusebenzisa imota yakhe.
Batshengisele abatshayeli abanengi ngoLwesihlanu emahofisini enkampani le eRandburg eJohannesburg ngemva kokubulawa komtshayeli weZimbabwe, uNguquko Gaza.
Abatshayeli laba abathwala abantu ngemota zabo besebenzisa inkundla yezokuxhumana eyenkampani yeBolt, bathi sekubulewe abatshayeli abanengi kakhulu, abanye betshiywa belimele okwempilo yabo yonke kanti abanye njalo sebethathelwe imota zabo ngenxa yokwehluleka kwale inkampani ukubavikela.
Emfanikisweni kamabonakude egcwele ebulenjini be-internet, kubonakala abantu ababili bebamba uGaza inkunzi ngemva kokuzenza abafuna ukulayitshwa. Qede lapho abantu laba basuka emoteni kaGaza, besekubonakala yena esephuma angathi uyabalandela. Kulaphoke omunye wabo omthululela inhlamvu okuyikho okuthethe impilo yakhe.
Unobhala jikelele wenhlanganiso ye E-hailing Partners Council uMnumnzana Melithemba Mnguni uthi bahlangana lalezi izehlakala mihla ngemihla.
“Kuleli viki nje lodwa ashone ngalo, we have had abanye odriver abangu 4 abashonileyo ngendlela efanayo bedutshulwa. So, yinto evame kakhulu ku industry yethu. Abodriver bayaphela kula ma APP and babulawa ngabantu abasuke bacabange ukuthi ngama passenger wabo.”
Umtshayeli wesifazana uNkosazana Phumla Faye uthi lingozi iphindwe kabili kubomama abenza lo umsebenzi.
“Sikhala ngeprotection. IBolt ayisiprotecti. Isenza i last priority. I priority yabo ngama customer, which is abantu laba abasibulalayo. Besicela ukuthi i improve isecurity especially thina as women.”
Omunye umtshayeli uMnumnzana Shein Dube uthi uBolt akufuna kibo yimali yabo kuphela.
“Njengoba manje sesifelwe ngumfowethu uGaza, nangu ulele la. Why uBolt engasicompensethi? Udutshulwe ngumuntu oberequeste uBolt. And uBolt ma efaka amatrip akhe ingena uyasho ukuthi unsafe area so, why ngendlela abastrict ngakhona kithi engabi street kumaclient wakhe.”
UMnumnzana Mkhululi Dube laye ongumtshayeli uthi iBolt ilomlandu wokubavikela.
“So, besicela ukuthi uBolt averifaye amaclient akhe okokuqala. Bonalaba abantu asinikeza bona amacustomer akabaverifaye. The way a strict ngakhona kithi amadrivers, uBolt akabe strict nakubagibeli bakhona mhlawumbe ngaleyo ndlela sekungabangcono. Lamaprice yinto ezibalulekileyo."
Umtshayeli okhethe ukwaziwa ngokuthi nguZwelibanzi uthi sikhona isisombululo sale ingxaki.
“UBolt imali esimenzela yona iningi kakhulu. Imoto nemoto efakwa kwaBolt kuyafuneka ukuthi ifakwe amacamera. Benze isystem lapho icustomer izakwazi ukuthi iziverifaye ma ingena ukuthi nguye lo umuntu lo. Ma akwazile ukuziverifaya uyazi ukuthi ngeke enze into ngoba uyotholakala.”
Inkampani yeBolt yona ithembisile ukuthi izaphendula izikhalazo zabatshayeli laba kungakapheli insuku eziyisikhombisa.
Uhulumende weSouth Africa uphakathi kokubumba umthetho ozalawula ukusebenza kwamankampani afana lawe Bolt ngendlela ezavikela amalungelo amabatshayeli laba.
Kusenjalo umzimba ka Gaza uhle wathwalelwa eZimbabwe lapho azangcwatshwa khona eNyathi. Utshiye ingane eyodwa lomkakhe.
Forum