Abadlali beqembu le Highlanders asebathatha umhlala phansi, bavakatshele emathuneni abalisa eAthlone kanye lase West Park lapho okwabekwa khona abanye babo asebadlula emhlabeni.
Ababengabadlali beBosso eminyakeni edlule laba babumbe inhlanganiso abayibiza ngokuthi, Former Highlanders FC Players Association. Umgcinisihlalo wayo uDouglas British Mloyi uthi sebeleminyaka emithathu baqala ukuvakatshela amathuna alabo ababedlala labo.
“Yindlela yethu eyokukhumbula abangane bethu esasidlala labo abasitshiyayo. Sakubona kufanele ukuba sibavakatshele yikho ke lokho esikwenzayo njalo lowu sekungumnyaka wesithathu. Langomnyaka ozayo sizaqhubekela phambili silokhu sisenza njalo,” kutsho uMloyi.
Unobhala wenhlanganiso yababedlalela iqembu le Highlanders uMarko Dube ukhuthaze abanye abangaphatheki kunhlelo zabo ukuba labo basondele basebenzisane ndawonye.
“Sibanengi ababedlalela iqembu le Highlanders. Ngiyakwazi abanye siyayengeka phandle lapha kodwa isicelo sami ngesokuba sibalandeni bonke bebuye bezosebenzisana lathi. Kumele sincedisaneni ngoba ukufa kusemuntwini wonke kodwa singancedisana lizabona ukuthi sisiyaphambili lasemahofisini abadala bazasihlonipha kakhulu ngoba besazi ukuba yithi esaletha amahofisi lokunye okukhona,”
Owayengumdlali, waba ngumeneja, waphinda njalo waba ngutshalimani weqembu le Highlanders uEarnest “Maphepha” Sibanda ukhuthaze abanye bakhe ukuba beqhubekele phambili ngenhlanganiso yabo.
“Asiyeni phambili bangane bami. Unkulunkulu esikwenzayo uzasinika okuqondane lathi. Lingayekeli baba Phiri, baba Mloyi. Sonke kumele silusekele loluhlelo,” kutsho uSibanda.
Ngemva kokuvakatshela emathuneni abadlali asebathatha umhlalaphansi laba babuthane eclub house yeqembu le Highlanders lapho abazilibazise bekhona kusosiwa inyama.
Abadlali ababedlalela iqembu le Highlanders asebehlala kwamanye amazwe baphathise ngosekelo lwemali efika inkulungwane lamakhulu amahlanu amadola aseMelika.
