Amankampani amanengi agoqela elungisa izimota, iZimoco, ngoLwesithathu aqhubeke ngokuxotsha izisebenzi kulandela isinqumo sedale leSupreme Court esiwavumela ukuxotsha izisebenzi mahlayana kungela mpentsheni eziyitholayo.
IZimoco ilobele ezinye izisebenzi zayo incwadi izazisa ukuthi zizaphelelwa ngumsebenzi mhlaka 31 ngoMfumfu lonyaka kanye lokuthi kuqala nje namuhla akusamelanga zilugxobe emsebenzini.
Incwadi le ithi njalo izisebenzi lezi zizabhadalwa iholo lazo elenyanga ezintathu ezilandelayo. EMasvingo kulamahotela amathathu abikwa exotshe izisebenzi ezinengi.
Isinqumo seSupreme Court lesi sisolwa kakhulu ngabantu abanengi, abagoqela inhlanganiso yezisebenzi iZCTU, yona esicele uMongameli Mugabe ukuthi asebenzise amandla akhe ukumisa ukugunyulwa kwezisebenzi mahlayana lokhu.
Amankampani amanengi athi axotsha izisebenzi ngoba engelamali yokuzibhadala njalo esadalala ngenxa yokubhidlika komnotho.
Sixhume unobhala jikelele weZCTU uMnu Japhet Moyo yena osole isinqumo seSupreme Court esithi sesibangele umonakalo omkhulu kuzisebenzi.
