Umncintiswano womdlalo wenguqu owe Zifa Unity Cup obekumele udlalwe ngoLwesibili awuseyi kudlalwa.
Umbiko owethulwe nguMongameli wenhlanganiso ye Zifa uPhilip Chiyangwa uthi umncintiswano we Zifa Unity Cup awusela kuba khona ngoLwesibili mhlaka 22 Mpalakazi, kungoba kuzabe kungcwatshwa usomabhizimisi owake waba yisiphathamandla kuhulumende we Zimbabwe umnumzana Aguy Georgias emathuneni eHeroes Acre.
Amaqembu athi eleDynamos, ele Caps United kanye lele Bulawayo City kubikwa abesevumile ukuphatheka kulumncintiswano ngemva kokwala ukungena kuwo okwenziwe liqembu le Highlanders obekuhlelwe ukuba lingqikilane lele Dynamos.
Kusenjalo uChiyangwa ucele uxolo kumqeqetshi weqembu lesizwe uKallisto Pasuwa ngemva kokugconwa lumqeqetshi akwenziwe yinhlanganiso yeZifa yona eke yamxotsha umsebenzi ensukwini ezedluleyo esetheswa icala lokuba lobudlelwano obungalunganga lomela abadlali uGibson Mahachi.
UChiyangwa uphinde waxolisa njalo laku Mahachi obethe yena kumele iziphathamandla zeZifa ziqale zixolise ukuze uPasuwa ebuyele emsebenzini.
Ukuxotshwa kuka Pasuwa labasekeli bakhe kuphazamise amalungiselelo eqembu lesizwe lona elilungiselela ukuyaphatheka kumidlalo ye Chan ezaqhutshelwa elizweni le Rwanda ekuqaleni komnyaka ozayo.
Ingcitshi yezomdlalo wenguqu uFarai Kamambura uchaze ukubiselwa emsebenzini kuka Pasuwa njengento enhle kakhulu.
Iqembu lama Warriors likhangelelwe ukuvuselela amalungiselelo alo kusasa.
…………………………………………………………………………………………………………………………………………………………………………………………………………………..
Kolunye udaba olumayelana lomdlalo wenguqu iqembu le Emakhandeni elamajaha aleminyaka engaphansi kwetshumi lathoba minwe mbili yilo eliphakamise inkezo yalonyaka eyomncintiswano we Mabaleka Under – 18 Tournament ngemva kokunqoba ele Highlanders nge 4-3 ngemva kokutshaywa kwembekwa ngeSonto enkundleni ye Barbourfields.
Umdlalo lo ubuphele lawamaqembu engutshiki lobhanqa 1 ka 1.
Iqembu le Emakhandeni linqobe ele Sabona nge 1 ka nya kusigaba se semi – final kuthi iqembu le Highlanders lifinyelele kusigaba se final ngemva kokunqoba ele Santos nge 4 ka nya ku semi - final.
Limidlalo iqoqwa ngowayengumdlali weqembu le Highlanders uMelusi Mabaleka Sibanda.
Omunye wabancedisane loMabaleka ukuhlanganisa limidlalo uBheka Sibanda uthi isifiso sabo yikuba limidlalo ikhule isabalale lelizwe eminyakeni elandelayo.
Umgadli weqembu le Highlanders uMcCarthy Dube nguye othethe umvuzo we Top Goal Scorer ngemva kokuba ehlohle kane kuthi umdlali we Highlanders uBen Munsaka nguye okhethwe ukuba ngumdlali odlale ukwedlula abanye ikanti umvuzo kanozinti obambe ukwedlula abanye uthethwe ngu Wadson Moyo odlalela iqembu le Emakhandeni.