Amalunga edale lephalamende ngoLwesithathu achothoze kakhulu uhulumende ngokuvumela abesifazana abaphatheke embukisweni weHarare International Carnival ngeSonto ukuhamba nqunu emphakathini.
Abesifazana laba bebevela emazweni atshiyeneyo agoqela iBrazil lamanye njalo bebebukisa amasiko abo lendlela zomdabu emazweni abo.
Amalunga ephalamende athe kulihlazo lokhu, esithi uhulumende ubengamelanga avumele isehlakalo lesi
Kodwa umsekeli kaMongameli, uMnu Emmerson Mnangagwa uthe ukunqunula kwabantu laba akutsho ukuthi uzulu weZimbabwe sezalandela umkhuba wabo.
Uthe njalo akula lutho olubi abalwenzileyo abantu laba ngoba injongo yombukiso lo ibingeyokubukisa imikhuba lamasiko yabantu abatshiyeneyo.
"Sikusolile kakhulu lokhu ngoba kululaza abantu besifazana njalo kufaka impilo zabo engozini yokudlwengulwa," kuchasise ummeli weBulawayo East edale lephalamende uNkosazana Thabitha Khumalo ekhuluma leStudio 7.