UNkosikazi Grace Mugabe selandule imbiko yokuthi ukhokhela icele leZanu PF elilwisana lelikhokhelwa nguMnu Emmerson Mnangagwa kumbango wentambo zombuso alubana uMongameli Mugabe ethe wasuka embusweni.
“Bakhona abathi kulecele engilikhokhelayo. Yingcekeza le,” kutsho uNkosikazi Mugabe ngolaka emhlanganweni awenzele eChimhanda ngoLwesithathu.
Abanengi bathi uNkosikazi Mugabe ukhokhela iqembu elizibiza ngokuthi yiG40 elilamalunga agoqela uMnu Jonathan Moyo loMnu Savior Kasukuwere.
Kodwa ukulandule lokhu esithi imbiko le ikhitshwa zintatheli ezimzondayo ngenjongo yokumngcolisa
Umsekeli kaMongameli uMnu Phelekezela Mphoko, obesemhlanganweni lo, laye ukulandule ukuthi kulecele elikhokhelwa nguNkosikazi Mugabe.
Uphinde wasola owayengumsekeli kaMongameli uNkosikazi Joyce Mujuru esithi ungumuntu omubi kakhulu.
Uthe lanxa engaze afe kasoze angcwatshwe emathuneni eNational Heros Acre lapho okubekwa khona amaqhawe elizwe.
“Akusithokosizi njengabesifazana ukuthi omunye wethu kulesisigaba nxa sefile kasoze aphiwe inhlonipho yeqhawe lelize ngoba wathatheka wahlamuka,” kutsho uNkosikazi Mugabe.
Wabele abasekeli beZanu PF ukudla okugoqela umumbu, irice, imvundiso yefertilizer, izigqoko, izicathulo lamathalakitha okulimisa.
Lanxa uNkosikazi Mugabe ekulandula ukuthi usekela uhlangothi, ingcwthi kwezombusazwe uDr. Brilliant Mhlanga uthi ngempela umkaMongameli lilunga leqembu leG40.
“Okwenziwa nguGrace konke lokhu kusekelwa liqembu leZanu PF, laba okuthiwa yiG40,” kuchasise uMhlanga.
UNkosikazi Mugabe, yena obehamba lequla labaphathintambo bakahulumende, uphakathi kokubhoda ngelizwe esenza imihlangano labasekeli bebandla lakhe.
Kunjalo nje, amalunga ephalamende asole abaphathintambo bakahulumende laba ngokwehluleka ukuzephendula imibuzo edale ekhetha ukuya emhlanganweni kaNkosikazi Mugabe.
“Sicele usomlomo wedale ukutha abaphathintambo laba bajeziswe ngoba besuke balandelana loNkosikazi Grace bonke bona bekwazi ukuthi kumele bazephendula imbuzo yamalunga ephalamende,” kutsho ummeli weBulawayo East edale uNkosazana Thabitha Khumalo.