Uhulumende weMelika uthi lanxa engakazimiseli ukuvuselela ubudlelwano obuhle leZimbabwe, uzaqhubeka esekela uzulu ngenhlelo ezitshiyeneyo ezigoqela ukudingela abalambayo ukudla kanye lokupha abaphila legciwane leHIV amaphilisi.
Isithembiso lesi siphume ngoLwesithathu emhlanganweni wekomidi yedale leMelika eleCongress ebona ngobudlewano balelilizwe lamazwe eAfrica.
Umhlangano lo ubuhlaziya umumo weZimbabwe lelakusasa lobudlelwano phakathi kwamazwe womabili njalo uze ngemva kokuba uhulumende weMelika ethumele iqula lakhe eZimbabwe kumaviki amathathu edluleyo.
Obekuqula leli uNkosikazi Shannon Smith utshele ikomidi le ukuthi ngakubonileyo eZimbabwe, akukabi lesizatho sokuthi iMelika idlelane kuhle leZimbabwe.
Wengeze wathi uhulumende weZimbabwe uqhubeka engananzi intando kazulu njalo engahloniphi amalungelo oluntu.
Ekhuluma emhlanganweni munye umgcinisihlalo wekomidi yeMelika le, uMnu Chris Smith uthe usekelo uMongameli Mugabe aluthola kunkokheli yeAfrica lwenza kubenzima ukuthi kube lenguquko kwezombusazwe eZimbabwe.
Ingcwethi kwezombusazwe uMnu Rejoice Ngwenya utshele iStudio 7 ukuthi uvumelana loSmith ekuthini umnotho weZimbabwe ubhidlizwe ngumbuso weZanu PF omubi, hatshi izijeziso zenotho.
Kodwa umsekeli weZanu PF uMnu Morris Ngwenya ukulandule lokhu esithi okudilize umnotho weZimbabwe yizijeziso ezafakelwa eleZimbabwe ngamazwe afana leMelika.
Omunye wabakhulume emhlanganweni lo ngumlimi omhlophe owathathelwa ipulazi uMnu Ben Freeth yena othe abalimi abamhlophe baqhubeka behlukuluzwa nguhulumende weZanu PF.
